上周經紀黃提到華寶國際（336），因為配股價折讓大，復牌之初可能會大跌，但跌定之後，可以重新留意。結果華寶上周五復牌，股價果然大跌，而經紀黃就重申不宜看得太淡，認為隻股有潛質。
華寶大股東上周以每股2.20元，配售6.9億股，套現15.18億元，上周五復牌，股價最低跌至2.21元，迫近配股價，收市抽回2.33元，仍跌16.79％。
經紀黃問小初，記唔記得德意志銀行配售華寶股份時，價格範圍係1.95元至2.20元，最終定價係2.20元，即係以最高位訂價，反映芬佬對隻股反應唔錯，而隻股復牌首日守住配股價上面收市，睇嚟沽壓已消化得七七八八，已開始要留意。
另外，佐丹奴（709）上周五發出通告，證實曾獲日本Uniqlo接觸。隻股今日復牌，小初問經紀黃點睇，佢話呢排有收購傳聞的股票，隻隻都炒得一大餐，佐丹奴估計唔會例外。
慕容小初