先一排國企高層大執位，中信集團王軍退休，由第二把交椅嘅孔丹（圖）坐正。孔丹嘅「二奶」命運，終於改變。話說孔丹自從由仕途跳入商海，即加盟光大集團，一直都執第二大權，而佢喺二千年調任到中信做副董兼總經理，都係阿二。
咁好多人都知，光大嘅阿頭車輪轉，先後有王光英、邱晴、朱小華、劉明康等，但係孔丹歷事數朝點轉都轉唔到佢，可以話係光大成立以嚟，做得最耐的高層。
咁硬淨當然有背景。孔丹父親孔原喺文革中被指為「特務頭子」，皆因解放前佢曾經任中央調查部部長，呢個職位聽落都知唔簡單；而佢阿媽就係周恩來秘書，孔丹年輕時，文革初起嗰陣，已被認定為接班人的榜樣。而佢今日接替王震位公子，架構上地位仲高過榮太子，當然唔止好彩咁簡單。