連續幾日，冇講個市，升到17000水平，點都要唞吓氣，調整番三幾百點仲好。
上禮拜五，大市「徇眾要求」，跌番160點，落到16887水平，上禮拜二話過，以由5月中開始形成的複式頭肩底形態來衡量，後抽整固能守穩在頸線16600之上，再起升浪就可向5月高位17328的阻力挑戰，目標係18000。
近期推介嘅股票世紀陽光（8276）、華翔微電（1195）、佑威（627）同光大國際（257）等都有好表現。華翔一度由1.10元衝上1.35元，兩日內升幅22%，之後打回原形，又係低吸機會。光國上周五買盤力量好大，衝上0.89元，其後受大市急挫拖累，回番0.84元收，只微跌1仙，升浪應未完，短炒仲有機。
今日講北泰創業（2339）。北泰係產銷汽車零件公司，未講佢之前，先睇吓內地汽車業新鮮熱辣嘅數字，國家發改委指出，上半年內地汽車產量升27.8%，其中生產轎車210.1萬輛，升53.21%；汽車業上半年實現利潤3.58億元人民幣，升58.5%，升幅僅次於有色金屬行業。
重上配股價 PE僅10倍
北泰主要產銷汽車制動系統，大部份外銷美加同歐洲，海外站穩陣腳後，北泰已將未來發展重點指向神州，計劃加快內地收入在3至5年內達到佔整體營業額20%的目標。
神州汽車業高速發展，一打開市場，收益會好可觀，北泰現時已開始付運多款車型的前後橋及懸掛總成，隨着供貨能力提升及產品開發計劃逐步落實，內地市場銷售就可持續增加。
北泰06年度（3月年結）營業額26.58億元（人民幣．下同），升20.4%，盈利3.47億元，升27%，每股盈利35.24仙，升21.7%，全年派息7.7港仙。
今年4月，以先舊後新方式配售1.7億股，每股3.625元，集資約6億元，用作擴展廠房及產能，預期07年度盈利可上升至4.5億元，每股盈利36仙，唔好話多，只要上番配股價，PE都只係10倍。基金呢個位接得貨，冇理由唔反攻。
大行估計北泰08年度每股盈利可達43仙，就算升到3.60元嘅PE亦只係8.5倍，睇多1年，股價上升動力仲大。
郭兆誠