呢期「風吹垃圾桶K.O.女人」紅爆！亦令派比安呢個超強三號波更多人認識，最近上Yahoo啲煮食討論Forum，好多人都對呢個風好多怨言，嘈得最大聲嘅首數家庭主婦！
連月嚟嘅大雨，已經叫啲菜價急升，當中代表作，可算係大家常食嘅菜心！菜多價平時，大概只係$4/斤，近排雨多浸爛菜，已經陰啲陰啲上到$8-$9/斤，再經派比安搞一搞，𠵱家已升到上$12/斤，真係貴得過份！有人話同啲街市菜檔傾過，呢個「貴菜時期」，大家仲要捱多2至3個禮拜，都咪話唔慘！
有啲知慳識儉嘅網友表示，呢期最抵買都係椰菜，呢種菜價錢一向好穩定，平均約$3/斤，而且夠襟擺，用保鮮紙包實放雪櫃，成個星期都唔爛，天氣唔好時最宜做存貨！記者：謝翠玲