今日係七月十四盂蘭節，俗稱「鬼節」；經常遇到靈異事件嘅Jinny話要做足預防措施：「今年有閏七月，無形中呢個鬼節玩足2個月，真係要小心啲！」二話不說搵風水大師麥玲玲教路，睇吓有何方法可避免撞鬼，「盡量唔好去夜街就必然㗎喇！其實飲食方面，有三樣法寶可提升你嘅正能量！」囍慶菜可沖喜，食柚皮可辟邪，另外食素菜亦能增加自己的正能量，咁今晚就唔使怕見到「污糟嘢」啦！
記者：曹三
攝影：伍慶泉
示範：柴灣Jinny
添丁骨醋香酸甜勁醒胃
價錢：$25/4人
需時：25分鐘
材料：
排骨8両、薑數片、甜醋7湯匙、米醋1湯匙、豉油1湯匙、糖/鹽/生粉各少許
1.醃肉
將排骨以豉油、鹽、糖，先醃20分鐘。
2.炸排骨
將排骨沾上生粉，放入油鑊中炸至熟透。
3.慢火燜
甜醋溝米醋，加入薑慢火煮10分鐘，再放入排骨炒勻即成。
蝦子柚皮香口幼滑
需時：30分鐘（未計浸水時間）
價錢：$30/4人
材料：
柚皮4片、上湯500毫升、蝦子1湯匙、生粉少許
調味料：
蠔油1湯匙、胡椒粉/生粉各少許
1.浸柚皮
柚皮去皮，以水浸1小時；撈起榨亁水，換水再浸，重複4-5次，去除苦澀味。
2.上湯煮腍
以上湯加入少許鹽，將柚皮煮至腍身備用；正式煮時再蒸熱柚皮。
3.蝦子放面
爆香蝦子，加入1小碗上湯及調味料，打芡後淋上柚皮上即成。
貼士：
柚皮最好選用廣西黃色皮的那種，因為它的皮特別厚，煮出來更有口感。
生菜雜錦素菜包味清茹素
需時：15分鐘
價錢：$15/4人
材料：
生菜1個、青椒/紅椒/黃椒/洋葱各半個、粟米芯6條
調味料：
鹽/糖/胡椒粉各少許
1.做生菜杯
首先將生菜洗淨瀝亁，剪去多餘的葉，成杯狀。
2.齋料切粒
除生菜之外，將其他齋菜材料洗淨並切粒。
3.香炒齋料
爆香洋葱，放入青紅黃椒及粟米芯略炒，調味後伴以生菜即成。
閏七月2個鬼節
「今年閏七月，所以今年有兩個鬼節。」聽麥玲玲話，鬼節期間若唔想撞鬼，則不要深夜留連於卡拉OK、的士高等場所，因為那裏燈光昏暗，陰氣較重。另外，亦不要太靠近牆邊而行，以免與靈體太接近，因為通常鬼魂也依附在牆邊，尤其是牆角。
另外，衣着方面，不要以為紅色代表吉利就穿上紅色衫，因為紅色亦代表厲鬼，所以鬼節期間亦避免穿着紅色及黑色，最好就穿上黃色的衣服。而飲食方面，最好不要吃豬紅及韭菜，因為一般的道士都會戒食這類食品。
怕麻煩自創添丁骨
Jinny話最估唔到添丁時食的豬腳薑，竟然有辟邪的作用，不過燜煮的過程實在太煩，所以Jinny想出以排骨來代替，名為添丁骨，由於亦加入薑及醋來燜煮，所以亦有驅風的作用，剛生完BB的女士都啱食，而她亦建議，若想味道更辣，可使用老薑，但若想薑的口感嫩身啲，則可使用子薑。
