踏入7月，各大品牌新袋已陸續上場，率先跑出嘅係PradaNappaGauffre，專門店7月一出已經斷貨，就連二手店都十分渴市，出現有客問冇貨到嘅情況。米蘭站店長Tony：「呢排最多人問嘅袋係PradaNappaGauffre羊仔皮袋，最慘係周街都冇貨，就連明星想要都冇辦法。呢個袋有3個Size，最多人要嘅係中Size嗰款，賣萬八蚊左右，最大嗰個就賣二萬幾，最渴市當然係大路啲嘅啡色！」NappaGauffre咁Hit，全因獨特皺皮摺紋設計，刻意不均勻顏色，營造出脫色嘅Vintage懷舊感覺，全人手縫製，想複製真係一啲都不易。再加上天后娜姐近期孭過，抵Prada威番次喇！