孫柏文相信大家仲記得，1997年我哋特區被解放之後不久，特區政府眼見好多「無殼蝸牛」，擔心就算係比較富庶嘅中產階級，都無法安居樂業，恐怕佢哋會移民，引致另一次人才外流潮，對我哋特區長遠經濟競爭力構成威脅。所以為咗對付港英政府遺留下來嘅高樓價泡沫，就推出八萬五呢個政策。
如果大家問我：「孫柏文，你覺得八萬五究竟有冇提高我哋特區長遠嘅經濟競爭力？」我只可以學周恩來總理，當年被問及1789年嘅法國大革命對世界影響時咁樣答：「同志，還為時過早。」不過，八萬五真係成功擊破高樓價泡沫。成功程度，就連當時仲係議員嘅民主派前綫成員何秀蘭，喺1998年立法會選舉論壇裏面，被問及董政權最成功嘅政策係邊個時，Miss何都首選八萬五。所以大家千祈唔好話冇人支持呢個政策。
咁大家都經過呢個政策嘅洗禮，都唔需要多講我哋經歷過嘅嘢。不過，由1997年開始，都有親戚朋友、同學同事問我：「如果我想買樓，幾時買好？」咁多年來，我都係同一個答案，「董建華下台嗰日，就係買樓最好時機。」
出擊訊號在本周二
睇番轉頭，先至明白由千千萬萬人組成嘅市場有幾咁偉大、無所不知。特別係對未來嘅預測能力，市場真係有非常之強嘅前瞻性。點解我咁講？因為樓價到底嘅一日，最好入市嘅一刻，唔係「董建華下台」嗰日，而係「市場覺得董建華好快就會下台」嗰日。當然，我相信就連天文台嘅超級電腦，都冇辦法好得過市場講畀大家知「董建華好快就會下台」。孫柏文睇番數據，樓價到底，其實就喺2003年7月1日50萬人上街，跟住7月9日廿三條被否決嗰陣。
就係嗰一刻，全知嘅市場講畀大家知未來會發生啲乜。其實今日同大家講咁多歷史，都係想提醒大家市場嘅預測能力。近排，我都已經講咗好多關於花旗國聯儲局究竟會唔會喺今個禮拜二晚，8月8日加息嘅嘢。上個禮拜五晚，花旗國債券市場都已經預測禮拜二晚唔加息，如果債市冇錯，金、銀、銅、油都應該會升。
大家作為金手指嘅fan屎，都知道我對白銀情有獨鍾。相信就連我呢個覺得聯儲局為了控制通脹，一定要加息嘅死硬派，都開始相信呢個禮拜二晚唔加息嘅話，白銀下一個大升浪又會開始。會唔會好快升過上次15美元一盎斯高位？我都唔知，不過絕對有能力短時間之內挑戰呢個價位。又係我哋「白銀戰隊」上場嘅時候啦！
孫柏文