古巨基與日本潮流品牌BEAMST合作，推出港、日各限量100件的BEAMST×Kubi’sHommeTee，昨日終在港首賣。基仔特地到尖沙嘴主持開賣儀式，吸引過百歌迷到場，有歌迷於早上7時許便到達霸頭位，也有歌迷早前特地到日本先買為快，昨日即穿上到場打氣，更被基仔大讚：「你哋真係識貨。」
幫Kubi出碟
100件Tee昨在10分鐘內售罄，收益扣除成本會撥捐紅十字會，日本方面已答應破例加印，基仔說：「日本嗰邊不嬲同人合作都係出100件，今次做善事反應好，佢哋答應破例加印，希望賣多啲可以捐多啲錢，幫到多啲人。」基仔還透露計劃明年為Kubi出唱片，他說：「我想個仔唱歌，未知係由我扮聲唱定處理我把聲，總之明年會出兒歌碟，希望可以出一張碟就殺入紅館啦。」
採訪：蔡如玉
攝影：陳志嵐