向有蠻牛稱號的林寶堅尼，家族成員一個比一個蠻，最近最蠻位仁兄叫MurcielagoLP640，廠方幫佢由頭改到尾，包括引擎、懸掛、波箱、排氣系統、煞車、電子系統，當中要數改得「行」非佢副「心臟」莫屬，原本都只係得6,200c.c.、580匹馬力，經改造後，用了新一副6,500c.c.、馬力輸出大到去640匹嘅V12引擎，成架車比之前重，但0-100km/h加速只要3.4秒，為咗要Show一Show佢有幾蠻，廠方早前就拉大隊過馬拉雪邦賽車場一試其野蠻程度，計我話其實唔使試，淨係睇數字都知道佢一啲都唔好惹！
車廂愈改愈舒服
睇嚟車廠今次都好落本，事關今次改良唔止喺性能方面，就連車櫳都改到勁High「卡士」，真皮座椅經過重新設計後，車廂空間感比以前提高，座椅舒適度亦比之前好，就連錶板亦採用全新設計，音響就改用Kenwood3.5寸「闊銀幕」碟機，仲有埋DVD、MP3、WMA，擺明俾你焚機飛車，好吸引？等吓啦，聽聞架車遲啲會喺香港亮相。
記者：黃婉冰
