坐在中環立法會接受訪問的前一刻，張宇人還要盡最後努力，把桌上的意大利披薩大口地塞進嘴裏。他一生與食結緣，父親開食肆，幾歲大已經有廚師為他煮鮑魚、燕窩。長大後他擁有海洋皇宮等多間食府，連葉劉也在那裏擺酒。不過，「我嘅食肆，有啲賣咗，其餘嘅就結束咗。」
「我係東莞人，最愛吃甜，因為東莞出名產蔗糖。」但他請採訪截聽條例的記者吃蛋撻沙翁，自己卻一口也不敢吃。張宇人說，因為肥，惟有減甜、減油，還要一星期五天找教練去健身。「我整個家族都鍾意食，細細個伯爺就搵個廚師，煮名貴嘅鮑魚、燕窩。我老頭子最識食，佢好後生就搵到錢，30年代食在廣州，不過，之後佢肝硬化。」
張宇人說，父親肝硬化末期，都堅持要飲酒、吃肥豬肉，但他卻怕怕了。「以前我最愛飲cappuccino，後來發現肥咗五磅，改為少奶走糖，蛋白杏仁茶好好飲，不過都要走糖。」也許是見到父親得病，張宇人說連肥膏都要挑出來。
別人以為他很有錢，必定食得很好，但他卻說：「我乜嘢都食，麥記嘅魚柳包我都鍾意食。返到屋企，都係隨便喺雪櫃搵嘢食。」
………………………………………………………
在美國讀工商管理，回港繼承父業，張宇人曾經擁有十多間食肆，包括有名的海洋皇宮大酒樓。「嗰陣葉劉成日嚟飲茶，可惜中午總係爆滿，她就會搵我幫忙攞位。」與葉劉相識20多年，張宇人稱讚她堅強、能幹。後來葉劉結婚，在海洋皇宮擺酒。「嗰日我一睇見新郎，原來係拔萃師兄Sammy，我哋喺舊生會已認識。」張宇人說，Sammy離世，葉劉都很堅強，她最近回來，大家未有時間見面，但張宇人說會約她飲茶。
雖然出身於飲食業，張宇人卻看得很灰。「85至95年係飲食界嘅高峯期，不過之後一直萎縮。」他把食肆賣掉或結業，也許心有不忿，他決定為同業出頭。「政府無時無刻喺度打擊飲食界……敲腳骨，都搵飲食界嚟敲，派米總唔會有。」縱使他說與唐英年是好好朋友，但談到銷售稅就無名火起。「政府出一蚊，商界賠三蚊。有咗銷售稅，100蚊嘅嘢都變成108蚊，不過包括行政費核數費，最後只收回98蚊。」張宇人不忍銷售稅打擊業界，「富貴黨六年一次，都要出來遊行。」
………………………………………………………
「阿仔問我要唔要幫手，我說不必喇，找自己嘅興趣去罷。」繼承父業，但最後放棄的張宇人，看淡飲食業，寧願結束，叫兒子去讀最愛的藝術。他有兩子一女，最大的已30多歲。現時子女有自己的世界，連飲茶都很難夾時間。
太太蔡詠鈿醉心教育，在理大教書，各有各忙。「有時老婆仲遲過我返屋企。」家庭生活幸福安穩，難怪張宇人把立會當家，終日以吃為樂。訪問過後，他又在一大堆紙盒中，找那凍了的三文魚披薩，大口大口的吞下……
撰文：梁幸兒 攝影：曾顯華