仲有一個月，銀行就實行五日結算，同時在滙豐帶頭下，大多數銀行為保持競爭力都要延長服務時間，開埋禮拜六。本地銀行一場大革命，話就話在9月至展開，不過，場仗已經打緊。
上周禮拜五銀行公會個例會，破天荒開咗成兩粒鐘。會後署理公會主席滙豐嘅梁高美懿猛同守候嘅記者saysorry，又有問必答大講利率走勢。但係公會點解傾咁耐佢就冇透露，只係話滙豐開埋禮拜六係商業決定，並非開立唔好先例咁話。
華華聽賓卡講，當日個會其實火花四濺，傾唔掂數，所以搞咁耐。各行代表認為9月5號起五日結算，咁禮拜六就算開門營業，都只係畀客戶提錢存錢賣禮券，唔會收支票。點知，當日有間大行，竟然話佢周六都想收票，咁其他行點辦好呢？如果照跟可能要再請人（𠵱家為咗開六、日，全行已經請多1000人）；但唔跟呢，咁啲客肯定會流失。
滙豐一招五天工作六日辦公，已經搞到全行對手一頭煙。你話如果禮拜六都收埋票──甚至再加其他服務，班賓卡真係吊頸都似！
李華華