唐英年司長喺《頭條日報》寫專欄，自問自答、解釋及推銷GST，可算赤膊上陣，令左丁山有啲驚奇。最初本來以為唐司長對GST有設定立場，GST搞得成，佢會領功，GST被政黨推倒，佢咪笑一聲：「好一場公民教育」囉！如此，唐司長在政治上可立於不敗之地。
點知肥彭寧舍多口！賣書就賣書啦，係要多口評論幾句，講GST係累退稅，不利窮人。唐司長年少氣盛，立即反擊：「佢拍拍籮柚就鬆人」，將GST上晒心，視之為個人嘅crusade。據一位自由黨議員對左丁山講，唐司長對反銷售稅大聯盟竟然搞遊行──雖然短短哋，只得幾分鐘路程──甚為不滿。
物業代理夠「甚為不滿」咯，不過佢哋人微言輕，如果反對唔到，假設真係有GST嘅話，已經諗好對策。地產代理佣金將來要畀5%銷售稅，商舖寫字樓交易要交5%稅，例如一幢二十億元嘅寫字樓大廈，銷售稅就係一億元，咁大數目，邊個會真心願意畀呀？如果物業由英屬處女島（BVI）空殼公司持有（A公司），買家以另一間BVI公司（B公司）入貨，於是買賣雙方傾妥條件後，與代理一齊去澳門簽訂公司買賣合約，B公司買入A公司嘅100%控股權，當足係「境外交易」，避晒銷售稅。
當然，B公司買A公司，涉及盡職審查，法律文件複雜好多，但對國際地產基金以及大戶嚟講，完全冇難度；對旺角阿叔去買一間砵蘭街旺舖而言，用BVI公司進行買賣，當然係麻煩到極。結果係點？咪益晒啲大戶囉！億億聲嘅交易唔使畀稅，幾百萬嘅交易就交到足，肥彭講累退（regressive），並非空言。
GST或銷售稅最令人不滿之處，唔係累進累退，而係太過繁瑣，徹底破壞香港稅制嘅最大優點──簡單取勝。呢樣係香港嘅比較優勢，競爭力秘訣，香港有乜理由自斷一臂，學其他國家搞人民最討厭嘅稅種吖。請唐司長心平氣和地再想清楚。