好多明星都鍾意食日本菜，今次陳敏芝都話：「我最鍾意食日本菜！一於去食原始燒啦！」原始燒？唔會係BBQ啩？去到餐廳，見到一個直立式燒烤嘅炭爐，旁邊仲有一個大魚缸，睇嚟敏芝今次真係有好介紹噃，見住師傅將活魚即劏即燒勁新鮮，怪不得敏芝落order後，都要走埋個爐度自己燒啦！
記者：黃若茵
攝影：陳陶鈞
千度高溫燒活魚勁多肉汁
日本菜都分好多瓣，敏芝就話自己無一不歡：「魚生、海膽、壽司、冷麵、拉麵、天婦羅……全部我都鍾意食！」咦……你好似無提到燒烤喎！「其實我本身唔係太喜歡燒烤，雖然香口，但就唔及魚生鮮味，不過呢種用原始燒燒出嚟嘅海鮮就比一般烤物好味，特別係海鮮呀，肉汁好豐富新鮮。」梗係啦，海鮮都係即叫即劏，肉汁比冰鮮嘅多出好幾倍。而炭爐所用嘅又係比一般木炭貴5、6倍，白炭中最高級嘅備長炭，無煙無火，單靠過千度高溫將直插於旁邊嘅食物慢慢烤熟，肉汁流失甚少，夠晒原汁原味，咬落亦唔會覺得亁身。難怪食開日本菜嘅敏芝一食就已經知道原始燒與別不同啦。而直立式燒烤可避免食物肉汁滴喺炭上而影響炭嘅質素，原來將食物打直燒係有道理㗎！
日本裏原宿偷師
呢種直立式原始燒喺香港的確好少見，原來老闆David都係喺日本偷師：「有一次我去日本，喺裏原宿見到一個舖仔，入面就係做緊呢種原始燒。至於原始燒嘅由來，就連嗰間舖個日籍老闆都唔清楚，只知源自漁民。」試過好食，David一於照辦煮碗喺香港整番個，「自從喺日本見到之後，一直都好想喺舖頭搞番個，唔搞新嘢好悶㗎嘛！但係所燒嘅新鮮活魚一定要養喺大魚缸內，舊舖細攞唔到牌照，𠵱家搬咗新舖，終於整到呢個原始爐。炭爐旁邊用嘅係海沙，有助反射熱力。另外，我自己喺個爐上面加咗一塊網，將上升嘅熱力壓番落嚟。」不過大家想食就一定要有耐性，皆因燒活魚要成半個鐘，怕肚餓就可以叫啲燒粟米、燒雞翼頂住肚先喇！
燒雞魚$130
店中嘅活魚除咗雞魚外，另有石蚌、絲鱲同埋細鱗，而呢款雞魚油份及鮮味均較重，食起嚟肉質嫩滑但唔覺肥膩，且魚骨少，啱晒我呢種懶人。
帝王蝦$88
呢隻帝王蝦其實即係虎蝦，好大隻，燒前師傅只撒上粗鹽，以求保持蝦肉原有鮮味。上碟前先切成一小粒，貫徹日本美食易入口嘅風格。
初戀雞翼$38
David：「用咗西京麫豉、冬蜜、煮酒去醃，可以食到香淡嘅酒味，亦夠甜蜜蜜，所以叫初戀雞翼，淨係聽個名都夠吸引啦！」
牛肋骨$88
David：「用黑椒醃製，肉香帶點辛辣味。牛肉燒至6成熟，上碟時已起骨並切成薄片，面層烤得脆，食完包你話Juicy！」
牛油燒粟米$28
愈簡單嘅食物愈難整得好味，燒粟米係普通，但剛融化嘅牛油滲滿粟米，且烤得恰到好處，不覺亁身反而多汁爽口。
食客有say：唔知個爐做乜！
搵食攻略
屋台屋（28800655）
地址：鰂魚涌基利路太吉樓地下1號
營業時間：12:00nn-2:30pm，6:00pm-11:00pm
交通：太古地鐵站B出口
全店座位：75個，有數個卡座及半掩房間
人均消費：午市$60晚市$150
最好賣：燒帝王蝦，日賣30份
烤物要先食海鮮
雖然今次介紹嘅並唔係爐端燒，但係日式燒烤中就以爐端燒最為人所知。至於其起源，有人話於江戶時代，日本漁民愛在公餘時，圍爐而食。至於爐端燒用嚟傳菜畀客人嘅木槳，就由漁民使用嘅船槳演變出來。另外亦相傳日本一位皇帝想搵廚師即席烹調烤物，但係廚師有刀唔可以離皇帝太近，所以就用木槳傳菜喇！而食烤物時，最好先食海鮮，再食清新蔬菜，最後至食惹味嘅肉類，甜味重嘅粟米或者番薯就可以當作甜品食喇！