煲呔寫信同送朱古力畀班議員食終於奏效，班立法會保皇黨覺都唔瞓，喺終院判特區政府違憲生效前搞掂條截聽條例，否則成個政府變成無法無天，笑死班蠱惑仔。
搞掂截聽，跟住要開工做10月份施政報告，八方聽聞煲呔嘅心戰室已經幫佢老細廣發英雄帖，邀請各路人馬由今日起排隊同特首會面，反映佢哋對政府未來工作嘅意見。第一批見嘅係專業人士，之後到富貴黨、工聯會，民主黨同公民黨好似未定到見面日期，特首辦梗係唔認親疏有別，但係排出陣勢係咁，又難怪人哋咁講嘅。至於確實見面時間，有份參與代表專業人士嘅振英哥竟然話唔講得，要由特首辦宣布，使唔使咁神秘？
呢份施政報告分分鐘變成參政宣言，煲呔一定會大數自己嘅政績，然後展望將來連任可以有乜着數嘢派。