姚樂怡噚日去咗旺角西洋菜街行人專用區，同成班打扮性感嘅美少女一齊宣傳浴室用品，搞笑能手喬寶寶着埋背心短褲成個沙灘look咁到場，展現濃密體毛之餘仲俾姚樂怡用水照頭淋，不過喺攝氏成三十度嘅天氣下淋吓水，都咪話唔梳乎。
場面混亂
大班手持專業攝影器材嘅男士一早喺現場霸位影女，加上係禮拜日，人流特別多，過百人圍住晒，真係迫到馮仁昭差啲唞唔到氣。最弊就係大會安排失當，搞到場面鬼咁混亂，好彩一班性感靚女都冇畀人鹹豬手啫！
雖然現場亂過亂世佳人，不過姚樂怡一直氣定神閒，原來佢自細就住喺旺角，閒時最鍾意落街篤魚蛋。馮仁昭問佢驚唔驚俾人博懵？佢就話唔怕，仲話會叫喬寶寶保護佢喎！
