今日係農曆七月十四日，等我都講吓盂蘭節先！盂蘭節又關消費事？因為，好多人都以為今年閏七月，即係有兩個盂蘭節，鬼門關開兩次，所以要燒兩次街衣。(o_O)
前晚我同琳琳OT到夜晚11點幾，佢喺pantry叫我等埋佢走，「因為呢排鬼門關開呀；而且有兩個盂蘭節，我諗住買咗兩份衣紙，燒兩次！」呢個時候，突然有把男人聲：「喂！」嚇到我哋彈起，原來係同事mark哥嚟斟水，仲喃喃自語講：「咁八卦嘅。」唓！你夠八卦啦，偷聽人講嘢！！！(?_/)
我呢個OL界神婆即刻約玄學家麥玲玲傾傾；佢噚日坐架有司機揸嘅Benz嚟同我食晏，我笑佢愈嚟愈有米，佢笑到四萬咁口。佢解釋，傳統節日只計算正式月份，閏月唔計，即係今年盂蘭節唔會有兩次。
好多人覺得農曆七月唔係咁老黎；佢就話，雖然今年有兩個農曆七月，但其實玄學上嚟講，中國曆法係以一年廿四節氣計算，其中「白露」嗰日代表係農曆八月開始。今年閏七月十六日（新曆9月8日）係「白露」，所以嗰日開始已經算係農曆八月，嗰日出世嘅BB算八月出世㗎。
我即刻打電話叫琳琳慳番，唔使燒兩次街衣，但佢話：「都係幫啲無主孤魂，做多次無所謂。」撇開迷信唔講，都係善心啫。(^_^)
逄周一刊出