立法會連開55小時截聽條例馬拉松會，秘書處梗係要奉陪到底，坐喺范太旁邊負責提場嘅秘書長馮載祥做到嘔，晚晚半夜至走，朝早早到連菲傭都未醒就起身，早餐都冇得食，要馮太Jenny起身煮。講起馮太，佢因為長期幫助傷殘運動員，獲頒銅紫荊章，記得上次Jenny帶領港隊去雅典參加傷殘人士奧運，俾車撞到重傷，佢得獎實至名歸。
馮載祥忙，好彩有三個助理秘書長幫手，陳欽茂、吳文華同林鄭寶玲，幾個人車輪轉。不過，唔知份工係咪太難做，陳欽茂前日lastday，死都唔肯多坐一日等條截聽bill過埋，范太冇法，前晚喺立會大樓宴會廳同佢送行，仲破例開咗支紅酒請大家飲，一人細細杯，費事飲大咗，喺度亂講嘢影響投票。
八方本來想追問陳秘書長做咗三十幾年有乜感想，點知佢一支箭走咗，頭也不回。