噚日食完辣菜，流完一身汗，梗係想食番啲凍嘢平衡吓。夏日炎炎，有咩好食得過冰鎮菜？26年中餐經驗嘅江師傅，最近新創了老藕爽爆大法，原來只要將佢薄切加冰水一鎮，竟然有「反老還童」卜卜脆的口感，以後邊個敢話老藕只可以用嚟煲湯！
記者：葉雪芯
攝影：楊錦文
示範：江德寶師傅
鳴謝：麗豪酒店
夏天我最Buy冰鎮菜！
江師傅入廚廿幾年，可能平時對得火爐多，夏天佢最鍾意食冰鎮菜，「一來入口透心涼，最重要係完全不經爐火，食完包冇話熱氣又上火。」
冰水浸肉更脆
今次佢就諗到用蓮藕為其中一種食材。佢話，好多人都嫌老藕太硬，又無味，但佢就一於勇字當頭，試吓先；咦！原來只要將蓮藕切薄薄一片，嗰種入口即碎感覺，真係幾爽口！「最重要係用冰水浸一浸，會令佢嘅肉質進一步收縮，食落會更爽脆！」佢今次仲用咗東南亞嘅獨特食材，好似台灣白蘿蔔同埋泰國金柚，入口鮮甜又富香味，用嚟做凍食一樣咁惹味！
芝麻蓮藕片手撕雞 爽口有創意
價錢：$50
需時：20分鐘
材料：蓮藕1/4個、貴妃雞1/3隻、芝麻少許
汁料：麻油1/2茶匙、貴妃雞水4茶匙、古月粉、鹽、糖少許
貼士：如果沒有浸貴妃雞的調味水，可用雞上湯代替。
鮮蝦金柚白玉絲 清新鮮甜
價錢：$35
需時：20分鐘
材料：蝦10隻、台灣白蘿蔔1/5條、青瓜1/5條、泰國金柚1/4個
汁料：麻油1/2茶匙、魚露1茶匙、古月粉、鹽、糖少許
貼士：要蝦爽口彈牙，灼熟後要即時放入冰水中。如想再冰涼一點，完成後可放入雪櫃冷凍2-3分鐘。
雨花海蜇頭鮑螺片 勁彈牙
價錢：$60
需時：20分鐘
材料：海蜇1片、頭鮑螺片10塊、葱絲、紅椒絲、芫荽少許
汁料：麻油1/2茶匙、麻醬1茶匙、豆瓣醬1茶匙、魚露1茶匙、古月粉少許
貼士：灼熟頭鮑螺片時不要過久，剛熟即可，否則會太韌。