談事業，好哋哋。
凡是曾被歸類為「𠝹女王」或「賤男」的，被問到感情事都會馬上進入戒備狀態，余文樂也不例外，他使出防衞武器：「不如講番正題啦。」
他的正題是《龍虎門》，這明顯只是今天的副題。
防衞門鎖上，想芝麻開門，要用通關密語。
我說：「你好似全職追女仔，天蠍座應該好專一。」
余文樂說：「你信我就話你知，你信唔信我先？」
我說：「我信。」
卜一聲，他便開始滔滔不絕說他的愛情觀，但所有女人名字，仍然鎖在保險箱。
娛樂圈真亦假時假亦真，藝人何時說真何時說假，報道可信不可信，有時連當事人都感茫然。
信者又如何？如果不信，就當看笑話一場！撰文：蔡如玉
談事業
余文樂18歲時行街被星探發掘加入種星堂成模特兒，2000年，他接拍港台青春劇《青春@Y2K》，02年正式簽約環球唱片當歌手，至今出過4張唱片，只有《還你門匙》及《生還者》兩首歌較為人熟悉，去年約滿唱片公司後，歌手之路被迫暫停。雖然在樂壇發展一般，余文樂在影圈表現不俗，曾接拍《下一站天后》、《無間道》、《頭文字Ｄ》等電影，在《一碌蔗》、《無間道2》中孭飛任主角，於在正上映的《龍虎門》中飾演石黑龍一角，參演電影超過20部。
拍戲不唱歌？
拍《龍虎門》最辛苦係要長時間不停耍棍，喺橫店拍時天氣又凍，我着住背心皮褸，好似冇着咁，講對白都震住，一停機即披兩件羽絨，最好彩我有個假髮，救咗我呀，冇咁凍嘛，嗰度零下幾度咋。身體辛苦都可以頂得住，精神上大家幾有壓力，因為抱住好大期望，要求好高。
石黑龍呢個角色性格好直接，乜都冇所謂又講義氣，係好為得朋友嘅人，性格好吸引，我自己都好鍾意，佢唔反叛但好執着，追求要做嘅嘢都要做到，好似想學雙截棍就點都要學，唔係好勝，係有決心。我同石黑龍都似，好似初入行唔適應，做呢行咁難做，開頭都諗過轉行，結果係死都要做，堅持落去。
我上年好少喺香港，不停出埠工作，拍嘅戲都去晒大陸拍，又去泰國、日本同橫店，又四圍宣傳咁囉，大家見唔到我但其實我忙到暈，今年唱片合約有問題，專心拍戲先。拍戲同唱歌好唔同，我冇話鍾意邊樣多啲，唱片比較個人，但滿足感大好多，拍戲團體冇咁悶啦，我出唱片唔鍾意多，一年出一隻就啱啱好，我覺得咁樣雙線發展一半一半都OK，之前啲碟唔夠時間宣傳，錄完音即走咯，歌要紅，人唔喺度都紅啦，所以唔關事話唱片公司宣傳不足，冇得講㗎。人哋一直做緊蝕本生意，要體諒佢哋囉，跌得多你都怕啦，佢哋仲肯幫你做，已經幾好心地㗎。做生意，可以做好啲邊個唔想做好啲呀？做到最好都不過賣五萬隻嘅話，都唔夠翻本啦，做碟咁貴。
啲人覺得我演員形象鮮明過做歌手，可能我拍戲有天份，都幾好運，唱歌就未配合到，我都唔係遇唔到好歌，但冇運，花好多心機時間都未做到滿意成績，但拍戲我就幾好彩，導演錫我，次次都遇到好導演同好戲，不過靠運行唔足全程㗎，唔可以貪心，一步一步啦。
對唱歌我依然都會堅持，有機會叫糊咪再上訴囉，至少𠵱家喺電影方面唔錯，做人唔可以太悲觀，畀自己好大壓力，退一步諗，我出道到𠵱家拍咗20幾部戲，人人話個市靜，冇工開，我就平均每年六部，都未停過，接住有得揀有得拍，之前有《無間道2》、《頭文字Ｄ》，如果今次《龍虎門》嘅成績好，我就連續三年參演票房冠軍電影。
攝影：陳慧安
場地提供：TWENTYONETWENTYONEBAR