難得與老編同遊碟舖，眼見佢手執熱辣出爐3區《冷血字傳》，口中念念有詞、天人交戰了半分鐘！「冇電腦特技、冇炸機音效、又冇打鬥……」以上所講都冇錯，不過佢有嘅係5項奧斯卡提名、一個最佳男主角同係一齣好戲；多月前美版1區已在奧斯卡期間推出了，今個星期連港版3區都出埋，據知碟片內容同美版完全一樣；寫煲碟、食爺飯、着乸衣！一手將它搶過來，掉到Casher，「老」細唔該畀錢！
記者：朱崇德
真人小說電影先驅
柯德莉夏萍主演嘅經典《珠光寶氣》或許未睇過，但小說原作者杜魯門的鼎鼎大名，都總叫聽過吧！至於最巔峯的小說創作就叫《冷血》（Capote）！話說1959年一日在報紙上，佢讀到一則堪薩斯一家四口滅門慘案，於是親赴當地，經過六年明查暗訪，並周旋於殺人犯、警察及與事者的對話中，最後寫出了建基於事實的小說《冷血》，這亦使他成為了「寫實文學」開創者；自始大家所睇的甚麼「改編自真人真事小說、電影」，都可以說是《冷血》的跟風之作，而《冷血字傳》，就是一部記錄了整個調查過程的傳記式電影。
內心戲感受深刻
《冷》是一套非常沉實的電影，簡單講係以「順時」平鋪直述整件事件過來；由於偏向寫實，甚麼高潮起伏、震撼驚嚇場面可說完全欠奉，睇的只是杜魯門（菲臘西摩荷夫曼飾）在調查整件事件中的抽絲剝繭；導演賓納米拿高手之處，係對杜的行為及心理狀態不作任何註釋，大家就只能在說話、行徑、以至每一個小動作，感受着杜每一刻在內心的天人鬥爭！對於睇慣荷李活式即食文化，甚麼都畫出腸的電影，初睇《冷》時可能對戲情有點難以理解，不過鍾愛者就是喜歡它多一點思考空間，令人能從心感受到杜這角色的劫難。
畫面意識俱不冷血
同一時空、同一間碟舖、亦係同一隻《冷血字傳》，不過攞在手上的是個十零歲死𡃁仔：「𠵱！個名幾兇狠吓喎，係咪玩變態殺手㗎？恐唔恐怖先？」眼見DVD舖老闆面部抽搐，答：「一開機，包你嚇個半死，因為佢係一套自傳式文藝片！」個𡃁仔二話不說就將隻碟掉返上架；哎！咁多電影都係叫好唔叫座，原來係咁解！
尾段高潮：死與不死？
荷夫曼的確演活了杜這個角色，攞奧斯卡最佳男主角亦是實至名歸；由最初的豁達開心，變成為挖料而不擇手段，好似以別人對自己身份上的信任，套取警方高層的秘檔；裝朋友，查找殺人疑犯史密夫及李察的身世，甚至以行賄監獄長的手段，用以取得獄內不限時的訪問權，每一重的心理變化，演得微妙又縝密。
全戲的高潮位，可算是尾段部份，《冷血》已寫成了大半，不過一直未能套取兩犯的殺人經過，可算書不成書！更妙者是他們一日未問吊、案件未了結，《冷血》亦冇完整結尾，所以亦不能成書；此外杜亦感性地將史視之知己好友，拚命為兩人聘請律師上訴延命，想他死與不死？可說是左右做人難！
必睇Bonus：真．杜魯門片段
完全「文場戲」！就算有DD5.1輸出，都唔會話俾你試到靚聲效！可幸畫質唔錯，拉上32"LCDTV都感覺OK滑淨！至於大家最關心的Bonus，Making、導演/主角講評都叫「報到」，簡潔唔煩氣，收貨啦！不過最正是加入了一段「真．杜魯門」訪問舊片，原來真人都係陰陽怪氣，而且基基哋，睇戲時仲錯怪荷夫曼玩晒嘢、鍊住喉龍講嘢，真係要講句Sorry！
PROFILE
價錢：$138（DVD）
$49（VCD）
區碼：3區
音效：DD5.1
發行：年代影視（27873612）