幫襯茶餐廳，皆因佢夠快，食物選擇又多。每次進茶餐廳，甫坐下，侍應便可以用一隻手拿起3杯水（甚至4杯），放到枱上兼幫你落埋柯打。四周觀察，從身邊走過的侍應無不是捧着三四五碟餸菜上手，像舞龍似的步伐將完完整整的食物送到客人跟前，這是在茶餐廳常見的畫面。B仔，在「極之好」做了一年多︰「初初入嚟，要幾個星期先習慣茶餐廳節奏，要快、要準。」講的是傳菜要快，準就是唔好拎錯去第二度。𠵱家B仔最多兩隻手加埋攞到7杯水，他說︰「午市多食客，好多時都要一次過攞住5碟飯畀客人。」（唔怕跌咩？）「多嘢做，忙吖嘛，無辦法啦。」小記試過要一隻手攞3杯水再行前送到客人枱上，我行咗兩步，杯已經要跌，估唔到做茶餐廳都可以練到手力喎！
記者︰方綺君
攝影︰楊錦文
金黃雞翼炒出前一丁 $34/細
呢個招牌菜係攞咗食神爭霸戰獎項嘅炒出前一丁，秘方當然唔可以公開，不過單是食嗰4隻炸得適中，咬入口仲有雞汁的雞翼已經值回票價。
車仔麵 $18起
曾經獲雜誌報章評為全港最好車仔麵，並唔係浪得虛名。食物款式超過40款，以鯪魚球、炸豆腐等最受歡迎。
滑蛋葱花炒蝦米腸 $28/細
沾上蛋漿煎蝦米腸，係極之好獨有，第二度無得食，食得多蝦米腸齋煎好悶，試過用薄薄一層蛋漿略煎再灑上葱花，腸粉更香口。
極之好(27802629)
地址：旺角豉油街21號C地下
