用廚房嘅砂煲罌罉當樂器好無聊？唔好咁講，話晒我讀大學時都曾經同班friend參加歌唱比賽，用啲煲、鑊同筷子嚟伴奏，結果仲做埋表演嘉賓㖭！所以來自韓國嘅Nanta絕對係我偶像，佢哋出名以廚房用具及食材作道具，打出輕快熱鬧嘅節奏，今次CafeTOO請到佢哋嚟表演，我又點可以錯過！你都想一邊歎住Buffet，一邊睇精采表演？咁就要即刻訂位喇，因為今日係Nanta最後一日喺香港演出！
記者：黃若茵
攝影：何家亮
跌咗個煲
表演剛開始，4位成員先企喺餐廳唔同嘅角落，其中一位成員扮唔小心將個煲整跌落地，然後便開始一連串嘅敲擊。之後4人走到場中間利用各款砂煲罌罉邊打邊跳舞，作為表演嘅開場。
扑頭？擋！
跳完一輪舞後，成員請埋觀眾一齊玩。現場播出烏蠅飛過嘅聲音，各成員扮晒見到隻烏蠅停咗喺男觀眾嘅頭上，於是就跳高以竹棒扑落觀眾個頭度，嘩，見到都覺得痛呀！
耍刀功
成員之間嚟一場大比拼，睇吓邊個刀功厲害啲，女仔（左）一刀就將青瓜切到爆花咁嘅樣，另一位成員（右）就一手將洋葱拋起，跌落嚟就啱啱好插咗喺把刀度，厲害厲害！
剁菜高潮
表演至尾段，4位成員均拿出生菜球勁剁，生菜碎周圍飛，氣氛都不知幾高漲！
30分鐘PG家長指引
你嘅夢想係做會計師？飛機師？太普通了吧！Nanta創辦人Song從小嘅夢想就係將廚房搬上舞台，「而呢個夢想嚟自佢媽媽，因為細個每晚準備入睡時，都會聽到媽媽喺廚房入面切菜煮嘢食嘅聲音，佢覺得好動聽，所以一直希望能夠將呢啲聲音搬上舞台做表演。」Nanta嘅經理人娓娓道來。1997年，Song終於夢想成真，「『Nanta』喺韓文解作『停不了的敲擊樂』，所以組員會利用各種喺廚房出現嘅工具、食物做道具，打出澎湃嘅節奏之餘，亦為表演加入搞笑劇情。𠵱家Nanta共有6組表演人員，有人專門留喺韓國，其他隊伍就負責海外嘅巡迴演出。」除咗香港，Nanta亦曾踏足美國、日本等地，足本嘅演出有90分鐘，可惜今次由於喺餐廳入面進行，為咗減少對客人造成滋擾，表演只抽出精華片段，全長僅30分鐘。眼見在場客人個個睇到入晒神，就知Nanta嘅表演有幾成功，不過大部份嘅演出有用上鋒利嘅菜刀，小朋友返到屋企千祈唔好亂學呀！
70人美食大劇院
今次CafeTOO請Nanta來到餐廳做騷，並非無厘頭，而係同餐廳本身嘅理念十分配合。公關Alda話：「我哋一向以『美食劇院』作為餐廳嘅主要理念，每次嘅餐飲經驗都好似經驗一場精采表演，希望除咗色香味之外，亦為客人帶來飲食上嘅視聽享受。」CafeTOO於年頭開始決定重新裝修，到前天終於以最新面貌示人，自助餐共分7個區域，包括沙律、海鮮、印度美食、麵食、中西式美食及甜品等，當中每個區域均以開放式廚房間隔，讓客人可看清楚廚師做緊乜，「雖然係自助餐，但我哋唔少食物都會即叫即做，客人就可以睇住廚師煮嘢食嘅過程，就好似一個表演咁。」可見Nanta嘅表演就同餐廳嘅概念好一致，在場亦可見到共70位員工及廚師嘅一舉一動，當係睇表演之餘，索性順便偷師學煮飯啦！
廚師即叫即做
沙律前菜嘅角落，泰籍師傅即場為人包泰式春卷，任你揀料。
泰式春卷
睇住廚師親手包畀我，食起嚟特別warm。我揀咗蝦、雞肉、蘿蔔同埋泰國香草，咬落啖啖肉又夠香口，而且米紙比一般嘅煙韌，有嚼勁。加埋泰式酸汁好開胃。
精緻冷盤
有亁番茄拼魷魚（前）同埋青瓜吞拿魚（後），魷魚又滑又爽，加亁番茄吃更帶出魷魚鮮味。以青瓜包裹吞拿魚則令口感有隻重層次。
煙吞拿魚
面層輕輕煙烤過，灑上香噴噴醃料，外層肉質鬆化，裏面軟熟且仍能保持魚生嘅鮮味，比一般吞拿魚生更惹味多了。
印式小食
牛肉腸辣味重，刺激味蕾。炸印度烤雞一樣夠辣，但炸過就比較香口。另外亦有糯米蝦餅、咖喱烤鯧魚同埋炸薯條，每款小食都滲出陣陣印式味道。
燒羊架
望住碟燒羊架好似好細碟，其實餐廳為咗令客人每次都攞到新鮮熱辣嘅羊架，特意做出較少份量。夾一件試下，果然仲係熱辣辣，且羊肉唔羶，好味！
紅莓千層酥
做法甚似拿破崙餅，但餅嘅層數較少，令客人可多試幾款甜品。紅莓較酸，但整個千層酥放入口就會平衡酸味，甜味反而較重，係甜品中嘅推介。
食客有Say：最鍾意睇剁菜
搵食攻略
CafeTOO（28208571）
地址：金鐘太古廣場港島香格里拉大酒店7樓
營業時間：6:30am-1:00am
交通：金鐘地鐵站F出口，惠顧滿$600可獲3小時免費泊車
全店座位：266個
自助餐價錢：假日午市〈12:00nn-3:00pm〉〈表演於1:00pm-1:30pm進行〉：成人$298，小童$198；假日晚市〈6:30pm-10:00pm〉〈表演於7:30pm-8:00pm進行〉：成人$398，小童$218
有着數：以滙豐白金卡或滙豐卓越理財卡簽賬，於星期一至五午市2-4位惠顧可獲8折優惠，如5-12位惠顧可獲75折優惠；晚市或假日2-4位惠顧可獲85折優惠，5-12位惠顧則可獲8折優惠。