荷李活巨星尊尼狄普（JohnnyDepp）做完朱古力獎門人，最近又做海盜，演技一向被讚，所以吳卓羲都封佢做偶像，睇佢嘅戲偷師。噚日吳卓羲出席尊尼狄普主演電影《加勒比海盜：決戰魔盜王》嘅宣傳活動，佢話：「呢套戲除咗睇大場面之外，我仲好鍾意尊尼嘅造型。佢有好多戲嘅角色性格都唔同，最鍾意《幻海奇緣》嘅鉸剪人。」
另外，前日吳卓羲農曆生日，但佢要喺工作中度過，佢話：「其實我嘅爸爸媽媽好傳統，鍾意喺舊曆慶祝生日。」最近吳卓羲忙緊拍無綫劇《學警出更》，佢話：「𠵱家都係廠景多，遲啲去PTU訓練學校拍就會辛苦啲。」