今屆16位候選港姐噚日乘搭輪船暢遊維多利亞港，大會安排佳麗着上二件頭泳衣同傳媒見吓面，仲公布埋最新體重同三圍數字。大部份佳麗喺呢個幾月嘅體重同三圍數字都冇乜大上落，惟獨7號周詠懿嘅體重竟然由原來嘅111磅暴升至117磅，唔夠一個禮拜就決賽，佢都可以畀自己增磅，真係歷年少有咯！
4號黃瑩縮水
噚日大會安排嘅兩件頭泳衣其實都唔算性感，連擁有35吋驕人上圍嘅4號黃瑩都喺件泳衣嘅影響下，明顯縮咗水，仲現埋肋骨㖭。誰知報稱只有33.5吋上圍嘅13號陳茵媺，忽然波濤洶湧，喺活動上搶盡風頭，問佢𠵱家嘅上圍Cup數時，佢就支吾以對，要由大會副統籌經理上前幫佢解圍。
至於參選以嚟新聞多多嘅「青衣薛凱琪」8號徐淑敏再次被抽中負責代表頒發錦旗畀贊助商，徐淑敏日前話預料自己會入五強，不過未必會奪冠，佢噚日就話最近睇咗本書叫《學會低調》，希望喺決賽前保持低調咁話！
