軟硬癲台新聞報道：首先係一則特別財經消息，軟硬推出全新大碟《LongTimeNoSee》，出現本世紀罕見嘅炒賣潮，部份唱片舖將軟硬新碟炒至199元，有二流分析員估計，若軟硬不和屬實，炒價有望創新高，而該分析員咪後念念有詞問候炒碟奸商。
詳細新聞內容。飛越癲狂院有病人集體絕食，要求院方於每日食飯時間播放軟硬新歌《Fantastic》，院長麥花臣表示，有病人誤以為此曲是某快餐店廣告歌，後經護士解釋此曲只是歌頌生命，院友代表答應停止絕食，但仍堅信是快餐店的宣傳歌曲。
警方消息。一名36歲婦人，埋怨丈夫長年只顧工作，而不解溫柔，危坐天台企圖自殺，談判專家即場播放葛民輝獨唱嘅《妳的生活》，婦人突然情緒大變，還喝罵警員，表示絕對不相信阿葛可以唱得如此深情，質疑被指偷食的阿葛因怕老婆，才會唱出這感人的心底話，但該婦人表示若果其丈夫肯為她是但噏發花癲高唱此曲的話，她願意放棄輕生。
交通消息。繼巴士阿叔後，穿姑窿隧道同潛水隧道出現雙層巴士阿叔，刺激當年報交通消息嘅軟硬天師大腦神經，創作《拍膊頭》。牛頭角順嫂認為，此歌風格貼接近軟硬當年水準，化時事為無厘頭的本領只此一家，而搞笑嘅糖衣入面依然有大道理。
體育消息。世界掌擊總會正舉辦一人一票會歌選舉，在《好兄弟》和《係咩唔係喎》中二揀一。前者用陰力勾心鬥角，不過「好兄弟像對夫妻」，正所謂無怨不成夫妻，溫情戰勝多年仇恨；後者半rap半唱，火氣夠猛，掌掌到肉，「望咩望𠵱家係咪唔妥」都唱埋出口，鬩牆兄弟打得更慘烈，不和傳聞變得更逼真。據票站門外調查fans手掌又肉，手背又係肉，兩首歌勢均力敵，難分勝負。
最後係一則宗教消息。得米高僧余僧向本台獨家透露，當年播下軟硬種子步入豐收期，《enocre》、《好兄弟》、《longtimenosee》同《軟硬》四首擺明討好fans，旨在懷舊，不問創新，難得大家照單全收，10場演唱會、紀念品和廣告等等豬籠入水，不和真真假假已不重要。
軟硬癲台新聞報道完畢，多謝收聽。
撰文：皇后大盜