祖雲達斯降班呢單嘢令佢哋久久未能成軍，原因係有唔少星級戰將希望另謀高就；我求大俠聽到啲意大利朋友講，伊巴謙莫域已按捺不住，想即刻執埋包袱離隊；咁啱日前祖記嘅友賽，佢就真係擅自唔隨隊，學埋車仔加拿斯啲曳曳嘢！祖記就諗住嚴懲伊巴，以收殺一儆百之效！
祖記開始咗季前熱身賽冇幾耐，上周五就作客地方球隊打吓友誼波，鬆鬆筋骨，場波祖記就大勝士比西亞四個一皮，但麻煩前鋒伊巴擅自「曠工」，辣㷫球會班高層都幾大鑊。祖記主席基捷尼知悉「缺席事件」後怒吼：「佢應該坐喺巴士度，應該去踢波，但係佢冇出現到！我哋對佢好失望，星期一我哋會傾番呢件事。」
國際米蘭有意收歸旗下
祖記都知道伊巴想走，但已表明會就呢單嘢向佢罰款，亦唔排除會以法律行動阻止「壞孩子」離隊。「罰錢」對球星嚟講好似我哋跌咗一毫子喺馬路咁，根本冇乜阻嚇作用。
其實，伊巴咁囂因為有「後盾」，國際米蘭嘅教練文仙尼就放風話，球會季前至少會喺意國3大中鋒查斯古特、東尼同伊巴中揀一個，雖然費倫嘅東尼都好有離心，但伊巴始終後生啲又大賽經驗豐富啲，所以咪有恃無恐囉！
「加拿斯玩完擅自離隊，??家要公開同領隊摩連奴道歉，伊巴就好學唔學，以為自己有啲天才就好得戚，我求大俠勸佢專心踢波好過！」