鍾欣桐嬌俏丫鬟
「以前同班女仔朋友都會影吓相，最記得未入行前，我同一個女仔去羅湖商業城玩，仲喺嗰啲舖頭影沙龍，啲相影咗出嚟好好笑㗎！嗰度影啲相又平，而且仲有好多個造型畀我任揀嚟影，我揀咗幾套衫，其中一套係中國旗袍，好似中國嗰啲丫鬟咁，我仲好記得當時係自己化妝㖭！」
方力申
左面任拍
「唔知點解我覺得自己左邊面個樣係成熟過右邊面㗎，所以我鍾意影左邊面多啲，有時我都會同朋友整啲古靈精怪嘅樣嚟影相，之後睇番都覺得好開心㗎。但係入行以嚟影相最辛苦嘅一次係同鄧麗欣影婚紗相，由朝早8點影到夜晚9點，有三部相機對住我哋不停影。」
蔡卓妍
籌旗沙龍
「同阿嬌一樣，最難忘一次影相就係同個朋友一齊去影沙龍，但我係去影樓影嗰隻。好記得嗰陣時係被迫，我好少特登影呢啲相㗎！點知班朋友唔夠錢影，咪幾個人一齊夾錢影囉！嗰次影相唔係自己自願去影，所以影得幾生硬呀，但係𠵱家諗番又覺得幾得意，都算係我同朋友之間一個回憶。」
黃宗澤
告別肥胖
「以前細個好肥，高峯期應該喺我讀六年班至中一嘅時候，最記得當時我同媽咪去韓國旅行影咗好多相，當時肥到雙眼得番一條線，5呎2吋高，但腰圍就有31吋！呢輯相點解咁有紀念價值？係因為我覺得一生中最肥係嗰時，我講過唔准再畀自己咁肥，睇住張相不斷提醒自己。」
