某日同Ricky傾開偈，佢同我講話有一次揸住架「前七」開篷車，諗住同女友去兜風，點知一上Highway，70km/h都未到，頭殼頂突然涼浸浸，一望先知原來自己個假髮已隨風飄去，佢話瘀到即刻想搵窿捐，所以想買過架，但又唔知點揀好。我哋就立刻搵嚟4大篷王做個測試，其中平治SLK在110km/h下才吹甩假髮、SC430排第2、smartfortwo都唔弱，80km/h喎。
記者：黃婉冰
攝影：陳陶鈞、黃子偉
Model：Cannis、Ricky(Salvador)
戴假髮開篷車同要注意嘅事比較多，好似開篷後，高速行駛時會唔會吹走個假髮呢？關上篷後隔音度夠唔夠高？關上篷後接駁位又會唔會好易入水呢？關上篷後尾箱容量又會唔會變得好細？為咗要知道時下熱賣嘅開篷車可唔可以合乎以上所有條件，我哋特別情商光頭Ricky戴假髮做咗個測試，睇睇每架車嘅擋風程度有幾高。
首先響青嶼幹線開着篷高速行駛，試吓Ricky個假髮在哪個速度下才飛走，同時亦會測試各車的關篷隔音度、防水度、尾箱容量、開關篷需時等，各位車友不妨作為買車時嘅參考！
揀有防滾架最安全
今時唔同往日，家陣開篷車嘅安全度比以前已經改良咗好多，以前舊款開篷車，一遇到車禍，只係得加固擋風玻璃支架（A柱）嚟撐住地面，以防車身塌下令乘客頭部撞擊地面，但車尾可能會向下傾斜，而後座乘客較貼近地面，所以好有可能會因而受傷，為安全起見，近年新款開篷車大多會加裝「防滾架」，當遇上意外時就會自動彈出，達到保護作用，所以揀車時記得揀有「防滾架」設計。另外，由於開篷車少了車頂作保護，遇到意外翻車時，即使有「防滾架」裝置，乘客亦會即時被拋出車廂，所以記住要扣好安全帶，以防萬一。
平治SLK280 假髮王BestChoice
Ricky有Say：「平治SLK開篷跑車最強係佢個風阻設計，開篷後即使無加風擋，要加油高速開到110km/h，個假髮先至被吹起，而且個假髮重係吹返入車廂，好明顯佢個風阻設計得幾好，就算女朋友Set好個頭都唔怕佢話吹到亂七八糟，加上佢有一副可輸出231匹馬力嘅V6引擎，就算開篷喺Highway高速飛馳都唔會遇到風阻而變得好吃力，加上佢個外形夠型又夠跑，最啱追女仔用。」
測試結果
甩假髮速度：110km/h
爆機試隔音：音量7度
噴水5分鐘
測防水度：無入水
開/關篷時間：22秒
關篷後
尾箱容量：放入小型行李篋後仍有空間
規格
引擎：2,997c.c.V6DOHC
馬力：231hp/6,000rpm
扭力：300Nm/3,500rpm
傳動：7G-Tronic半自動波
售價：$562,000
查詢：仁孚行（28957339）
smartfortwocabrio都有80km/h
Ricky有Say：「就咁睇smartfortwocabrio車仔細細，但估唔到80km/h先吹甩個假髮，另一個勝出的地方，就係個尾箱容量，除可以放入一個單人行李篋之外，兩邊都仲有空位可以放袋，兩個人基本上都夠用，雖然佢係採用軟篷設計，但一樣唔會有入水情形出現，車仔夠Cute，而且十零萬夠抵玩，啱晒後生小情侶。」
測試結果
甩假髮速度：80km/h
爆機試隔音：音量7度
噴水5分鐘
測防水度：無入水
開/關篷時間：約40秒
關篷後
尾箱容量：放入小型行李篋後仍有空間
規格
引擎：698c.c.直3SOHC
馬力：61ps/5,250rpm
扭力：9.7kgm/2,000-4,000rpm
傳動：6速+/-波
售價：$168,000
查詢：仁孚行（34288666）
凌志SC430 後座風阻勁細
Ricky有Say：「凌志一向以豪同舒服為賣點，呢架SC430車廂設備完全貫徹呢個宗旨，特別係佢個後座，氣流控制做得好好，後座唔係好大風，所以坐後座仍可戴假髮。另外，佢個隔音做得唔錯，而且車廂好舒服，開篷時間亦唔算好耐，就算落起雨嚟都唔怕變落湯雞，但車價係咁多架中最貴。」
測試結果
甩假髮速度：106km/h
爆機試隔音：音量8度
噴水5分鐘
測防水度：無入水
開/關篷時間：25秒
關篷後
尾箱容量：未能放入行李箱
規格
引擎：4,293c.c.V8VVT-i
馬力：286ps/5,600rpm
扭力：419Nm/3,500rpm
傳動：6前速半自動波
售價：$819,260
查詢：皇冠汽車（25119430）
標致307CC 尾座無乜風
Ricky有Say：「307CC外形屬於中等，最好係佢有4個位，車身扁扁，但風阻一流，後座空間唔會話好大風，亂流亦唔太多。車廂方面，關咗篷之後就更加舒服，而且佢開上篷後對個尾箱容量影響唔係好大，行李可以照擺，後座位可以照坐，外形都唔算好大架，有開篷車嘅瀟灑感。」
測試結果
甩假髮速度：90km/h
爆機試隔音：音量7度
噴水5分鐘
測防水度：無入水
開/關篷時間：25秒
關篷後
尾箱容量：放入小型行李篋後仍有空間
規格
引擎：1,997c.c.直4VVT
馬力：143hp/6,000rpm
扭力：200Nm/4,000rpm
傳動：4前速半自動波
售價：$323,800
查詢：法國汽車（31181828）