南華會主席盧潤森嘅千金盧恬兒，四年前憑甜美外貌、均勻身段及留美大學生身份，被譽為Ball場新貴，點知「出道」三個月就被霍啓剛追到手。前年霍公子背盧恬兒搭上跳水公主郭晶晶，搞到全港皆知，情場重創後嘅盧恬兒自此變成蒲界烈女，多次被拍得約會唔同男伴夜蒲，仲同前VRF組合成員丁子高傳過緋聞㖭。
揦口揦面
早排關仁又撞見盧恬兒喺中環夜會一名打扮斯文嘅四眼新歡，喺伊利近街嘅FATANGELO'S意大利餐廳撐枱腳，大歎家庭式意大利菜。大概到11點鐘，兩人埋單離開食肆時，一齊喺蘇豪區並肩漫步，雖然兩人有傾有講，但盧恬兒眼神有啲呆滯，揦口揦面，反而四眼男伴就幾好笑容，之後仲做埋柴可夫，揸住部接近150萬嘅寶馬M5房車載伊人遊車河。
話時話，幾個月前有消息指霍啓剛曾北上探郭晶晶，但一時又傳佢同盧恬兒復合喎，不過後者應該機會唔大，因為盧恬兒公開講過，形容同霍啓剛拍拖「恐怖」，況且盧恬兒身邊咁多狂蜂浪蝶，不愁寂寞啦，唔知呢位揸靚車嘅四眼新歡，會唔會係佢嘅真命天子呢？
