為有邊啲客戶會喜歡喺星期日買「產品」呀？Carrie想來係唔滿意銀行在星期日開工。老實講，水皮如左丁山都可以在平日辦公時間去銀行理財中心辦理事務，啲有錢人更有RM（relationshipmanager）服侍周到，年輕人喜歡用音頻電話、上網，邊類人會在平時冇時間去銀行，要等到星期日？當然唔會係大客。
恒生銀行總裁柯清輝在財經台講得坦白，恒生未決定在星期六、日辦公，要睇清楚啲，與員工充份溝通，等銀行界實施五日結算後有乜反應，而且內部評估過星期日開工嘅邊際收入與邊際成本後，再作考慮。嗱，柯大班思路十分清晰，可佩也。
每年呢個時候，例有讀者來郵問仔女升學之事。一位「心急家長C」話：「小兒高考，各科及格，未見成績高，不被取錄，惶惶不可終日，為父於心不忍，自問還有少許經濟能力，有意送小兒到外國一闖……」家長C問各國社區學院，左丁山已在本欄講過好多次，坊間有本「美國社區學院全攻略」，左丁山係編輯顧問，可供家長C參考。不過呢類書唔會暢銷，唔知書局仲有冇得賣。既然令郎已經高考及格，美國社區學院幾乎收梗，頂多考一次TOEFL就掂。
加州嘅社區學院與UC（加州大學）與CSU（加州州立大學）掛鈎，讀兩年得副學士學位，憑GPA（平均積點）可以在第二學年上學期申請轉入UC或CSU，例如GPA有3.8至4.0，可以有機會入柏克萊，3.7以上入UCLA，以此類推，轉到學校就從三年級讀起，完全冇蝕底。唔鍾意入UC，可憑成績申請南加州大學（USC）及其他大學，選擇甚多，最緊要嘅，就係令郎能夠專心讀好英文，攞到好GPA。須知道，有啲年輕學生去到美國就好似逃出父母手掌，拍拖玩樂乜都齊，就係唔掛住學好啲英文。呢類事情屢見不鮮，家長們不可不注意。