呢幾日班立法會議員晚晚開會，成十一點幾先走得，第二朝又要九點返到立法會，日日瞓得六、七個鐘，都咪話唔辛苦。八方噚日見個個議員一早都返齊嚟開會，不過議事堂就張張都係空櫈，究竟班議員去晒邊？
原來個個都因為太攰，頂唔順要去唞唞，於是就商借立法會房間做「臨時休息室」，喺入面瞓晒覺，搞到立會房間忽然爆滿。地產及建造界石禮謙唔知係咪搵唔到房，索性喺立法會前廳度瞓覺，仲瞓得非常香甜。不過當投票鐘聲一響，個個都要彈起身去投票，但係八方見班議員㩒完掣就即刻閃人，原來又係去搵周公。
大嚿話呢幾日食得太豐富，又沙翁，又蛋糕，肥咗三磅，建議立法會應該整個健身室，仲同班同事即刻去睇位。