2006年香港小姐冠軍係……，下周六自有分曉。曾幾何時是一家大小必看的電視節目，現在如流水作業，是否意味這個踏入第34個年頭的選美使命已完成？當大家討論「青衣薛凱琪」8號徐淑敏的忘年戀，97年四料港姐冠軍翁嘉穗卻認為選美只是娛樂節目，不應期望太高。談到夫婦相處之道，剛度過七年之癢的她說：「係人都會有脾氣，做大生意壓力自然大，有時咪當聽唔到。」撰文：梁錦雯
相信記得起今屆香港小姐選美口號是「美麗的召喚」的，一定比青衣薛凱琪い徐淑敏與年紀大她27年的工程師阿叔的拍拖新聞，點擊率來得少。當紛紛議論近年港姐是非多，時間可以做判官給它下定論，肯定的是港姐為我們帶來不少選美神話，有嫁入豪門的、有躋身成國際影后的、有成為電視台姐仔的。
分享選美貼士
97年，四料港姐冠軍翁嘉穗擊敗李明慧、佘詩曼、任葆琳和歐陽妙芝等強手奪冠，破了近15年港姐最高收視，達37點，逾216萬觀眾收看，TVB開香檳慶祝。問到卸任近10年的翁嘉穗對選美的看法時，她勸勉師妹應有以下的心理準備：「你要曝光率，咪出嚟講嘢，出多幾日報紙，緋聞同選美冇關，大家唔應該太執着，唔寫得太過份咪算。娛樂圈係showbusiness，係娛樂人嘅，選港姐都係一個show，係之前套咗太多elegant（高貴）形象入去。」
不少人認為選港姐的出路大多數是嫁入豪門或入娛樂圈的踏腳石，嫁予七海化工主席鄔友正的翁嘉穗卻說：「你諗吓選完港姐就要拍劇，邊有時間拍拖，好多人唔係選港姐都嫁入豪門，根本唔關事，港姐只係入娛樂圈嘅踏腳石，唔應該撈埋嚟講。我覺得候選港姐想舒服啲，唔應該咁諗，期望太高係閣下嘅選擇，好多人有咁嘅心態，我會忠告佢哋唔好諗咁多嘢。」
翁嘉穗選完港姐，99年結婚，之後生BB，樂於做家庭中的領導人的她說：「我係成班朋友中最早結婚嘅一個，可能我事業心唔重，鍾意家庭，媽咪又好早唔喺度，好希望有自己家庭。」問她人生最大成就，是奪得港姐冠軍或是嫁了家境不俗的鄔友正？她笑說：「選港姐可能係我人生中最複雜嘅事，不過我認為生BB先係最大成就，要經歷咁多個月嘅病痛。」
識睇眉頭眼額
今年翁嘉穗與夫婿剛度過了7年之癢，問到相處之道，她說：「係人都會有脾氣，做大生意壓力自然會大，有時咪當聽唔到，我唔鍾意同人嗌交，到我有火，佢又會收，見勢色可以發咪發。」至於囝囝快將升小學，她有心理準備與兒子一齊辛苦讀書，談到教仔的心得，她說：「身教好緊要，你想佢唔睇電視，咁你自己都唔好睇。有時候佢曳，好多時家長鍾意體罰去控制當時情況，其實個小朋友學緊你，諗住打人可以解決，咪返到學校打人。我個仔曳，我好嬲都唔會打佢，只會喝停佢，之後同佢深入淺出解釋番件事。」
攝影：陳慧安
鳴謝：MiniCooper
