8月過咗幾日，7月條數應該計好晒，又係代理公布成績表嘅時候，究竟係咪「五窮六絕七翻身」呢？
中原率先大派定心丸，佢哋7月生意額有1.167億元，比6月多咗接近35%；淨係住宅部已經有9985萬，比6月大升38%，總算飲得杯落。
公司業績好咗，自不然要攞啲誠意出嚟激勵吓基層員工，中原執董陳永傑宣布，500位後勤員工將獲發300蚊特別花紅，總數係15萬銀。
唔講唔知，原來對上一次發放後勤花紅，已經係3月份嘅事，換句話說即係足足捱咗3個月低迷期，今次嘅加息風暴都咪話唔勁，表面上仲以為係3號風球，實質風力達8級程度，吹到通行散晒，但都要頂硬上話只係3號風球啫。