下晝3點過後，港股沽壓忽然大增，恒指由17030向下殺，殺到埋單，唔見160點，收16887。唔使刻意搵理由去解釋個市點解會跌。如果要搵理由，一個獲利回吐理由已夠晒。
東亞C輪3576：東亞（023）晏晝派中期成績表，賺錢多過市場預期，上晝收33.60元，下晝收32.95元，全日唔見0.90元，又係趁好消息出貨。東亞由7月24日低位30.25元彈到前日最高34.40元，彈幅14%，由去年底至今升幅更達47%，無論有乜嘢好消息出嚟，出現獲利回吐，正常過食飯食得多就會滯。
東亞盤數的確靚，吼股價回落，譬如話回到32元邊邊，買C輪，穩穩陣陣，要隻3576。隻輪明年4月底夠鐘，溢價3.2%，槓桿率5.5倍（有效4.1倍），引伸波幅33.3%。
中企P輪3690：H指跌37點，中企P輪3530大升21%，上咗龍虎榜第10位，收3.5仙，例牌交投極疏。隻輪下月尾到期，溢價13.2%。炒仙輪，當然係希望刀仔鋸大樹，但以3530嘅條件，最後都係刀仔斷做3橛，大樹依然喺度。
如果睇淡H指，揀P輪埋手，正路係3690，10月尾夠鐘，輪價19.1仙，溢價3.1%，槓桿率11.5倍（有效6.9倍），引伸波幅30.4%。不過，炒H指窩輪，等低位揸C輪博反彈好啲。
要揀定中企C輪，吼機會買，則4618勉強諗得吓。話佢勉強諗得吓，係因為溢價雖然吸引，但買賣太疏，一出一入蝕章。
章盛