立法會繼續朝9晚12審議截聽條例，議員官員同八方可以行出行入蛇吓唞唞氣，難為主席范太一把年紀，坐到腰骨都痛，最慘仲係悶到嘔仍然要煞有介事，兼且又要睇住長毛呢亭反斗星搞搞震。八方昨日見范太仍然面帶笑容，真係EQ爆棚，令人寫個服字，唔怪得話他日佢唔玩，人大常委都有得做。
咁究竟個會幾時完？自從范太嚇大家話要開通宵之後，班尊貴議員當堂醒晒，進度明顯加快，白鴿黨阿涂話，最快可望周六深夜完成，如果唔得，星期日一定掂。張超雄亦改口話星期日應該可以如期飛（佢要去聯合國出席消除歧視婦女會議），唔使改機票。
其他議員則做足心理準備開通頂，有人諗計仔度過漫漫長夜。自由黨嘅林鍵鋒最有諗頭，佢話既然開會咁悶，又要坐足一晚，不如叫按摩員嚟立法會，幫班議員按摩雙腳。不過唔係為咗消除疲勞──佢笑笑口咁話：「個按摩員要識搵啱穴位，按到班議員唔識講嘢。」冇人講嘢就可以即刻散會？林鍵鋒真係太天真喇。
官員想雞髀打人？
劉健儀同高達就實際得多，一知道可能要通頂，即刻帶備牙刷，以防口臭。高達仲帶埋鬚刨，不過佢同八方講，見到班議員露出疲態，好似范太、吳靄儀同阿涂都講錯嘢，不如返屋企瞓覺，唔好折磨大家。
除咗幫自己解悶，唔少議員好有心（官員都一樣），為班日以繼夜留守立會嘅記者，送上一日三餐兼糖水，搞到記者室日日開大食會，個垃圾桶都滿瀉。例如張學明送甜品，林健鋒送麵，林瑞麟送蛋糕，行政署長謝曼怡送水果，馬時亨送鹹濕嘢如陳皮話梅，李少光送布冧……由朝到晚輪流供應。煲呔後來都送來朱古力，但係佢親疏有別，只係畀議員食。
以前立法會開長會，都好少有咁多嘢食，今次幾罕有，八方又小人之心，唔知係咪啲官搏見報，等啲報紙都登多啲食物相，轉移議事堂嘅視線；而請食嘢嘅多數係官，莫非想雞髀打人，等記者手下留情，唔好大鬧呢條截聽條例？
范太愈戰愈勇，坐喺佢旁邊嘅立法會秘書長馮載祥就反而有啲頂唔順，噚晚成晚冇出現，由吳文華頂住。