近年無綫台慶最引人關注嘅，已經再唔係藝員嘅表演項目，而係頒發最佳男、女主角獎嘅頒獎禮。不過，無綫為免頒獎禮嘅鋒芒蓋過藝員辛辛苦苦日練夜練嘅表演項目，加上好耐之前已經想搞大個頒獎禮，所以今年決定將頒獎禮同台慶分開嚟搞。
搞懷舊音樂會
馮仁昭收到風，無綫諗住喺11月4號舉行《翡翠歌星賀台慶》，跟住喺11月10號或者11號舉行頒獎禮，到11月19日，即係無綫生日再搞傳統台慶節目，三個大騷都會喺將軍澳電視廣播城舉行。另外，無綫見之前劉家昌開演唱會反應咁熱烈，食髓知味，決定趁住台慶月喺紅館再開六場懷舊音樂會配合台慶，暫定以劇集同電影主題曲，同埋樂壇變遷嚟做主題，實行有咁大搞咁大。
而視迷最關心嘅台慶劇，就由野蠻奶奶汪明荃嘅《東方之珠》同新抱仔胡杏兒嘅《肥田囍事》雙雙中選，肥杏為拍劇增肥40磅，今年攞硬女主角獎啦！
