做高層，最緊要識喺適當時候，出招護主，李國寶哥哥左右手、東亞執行董事彭玉榮（圖），喺噚日東亞個中期業績會度，就做咗個好好嘅示範。
話說東亞盤數幾靚，大家都冇乜挑剔，所以傳媒集中力量追問寶哥哥國內發展，同埋會唔會喺呢一兩年，將旗下嘅業務分拆上市。同八方搭同一架𨋢到場嘅寶哥哥，只係一味話東亞嘅「中國概念」，仲會陸續有嚟，分拆就言之過早……咁記者當然唔收貨，台上嘅一眾高層好似李繼昌、陳棋昌及尹焰強，都有幫口幫手答問題，惟獨係彭玉榮，全程𡁻香口膠，成場一粒聲都無出過。
之不過，喺寶哥哥俾人問完又問，答極都甩唔到身嗰陣，彭董好快手咁向司儀做咗個打圈嘅手勢，就係咁，寶哥哥可以鬆一口氣兼夾鬆人。