民建聯主席馬力冇露面好耐，大家好關心佢嘅病況，甚至有消息話佢要退位，將主席個位讓畀第二個。最近又有消息話佢已經好番，仲會趕返立會為截聽條例投票。不過，呢幾日都唔見馬力蒲頭，八方向曾鈺成打探吓，佢話馬力𠵱家喺內地治療，病情暫時未有惡化，精神都唔錯。點解仲唔返香港？佢就講：「你知啦，醫院方面梗係想穩陣，咪叫佢繼續休息。」
咁又係，𠵱家各位議員為咗條截聽條例，日日做到十一、二點先返屋企，前日王國興仲俾記者撞破佢講秘密電話，叫屋企人唔好鎖門！如果馬力抱病日以繼夜開會，真係分分鐘頂唔住。曾鈺成雖然話馬力已經好好多，但回歸無期，甚至幾時出院都仲未知，希望佢早日康復，繼續幫民建聯指揮大局喇！