99年成立嘅「香港志奮領留英獎學金學者會」又換屆，新上任嘅會長係大律師潘熙，戴啟思個徒弟，當年幫公屋婆婆盧少蘭同政府打官司，成功阻遲領匯上市。副會長就係前新聞之花，家吓轉做公關嘅魏綺珊。
潘熙上任冇耐，下個星期已經搞咗個BrainGym嘅活動，話等啲會員鍛煉吓腦筋，跟住會喺交易廣場開飯，畀新舊人聚首聯絡感情。咁每年一度嘅周年大會，就梗唔少得，之前陳日君同鄭海泉都做過主講嘉賓，今年搵邊個仲度緊。
潘熙話，佢哋會員全部都係攞過「志奮領」（Chevening）留英獎學金嘅得主，家吓有成300人，佢係第一批攞呢個獎嘅人之一。呢個獎學金由英國外交部資助、英國文化協會籌劃，每年為近20名港澳研究生及年輕專才提供赴英國進修嘅資助，每人可獲總值約30萬元，去英國讀書三個月至一年，食宿及來回機票都包埋。