歌手林憶蓮和EMI亞太區新媒體總裁兼GoldLabel藝人部總經理陳輝虹，於84年在商台共事曾擦出愛火花，最終分手收場；事後各自都經歷過婚變，20年後重遇，愛火重燃，可惜只是虛火一場。近日盛傳二人分手，陳輝虹昨日直認不諱，言語間更暗示「被飛」，不過他仍深愛女方，不排除會盡力挽救，但不希望再多等20年才能續緣。
現年40歲的林憶蓮與42歲的EMI亞太區新媒體總裁兼GoldLabel藝人部總經理陳輝虹，去年三月再次撻着，雖然外界一致看好這段戀情，期望二人早日開花結果，日前更傳出憶蓮懷孕，詎料昨日突然傳出分手消息。
語帶哽咽
「我真係覺得好可惜」
記者昨日致電陳輝虹求證分手傳聞，他直認不諱說：「係，我哋分開咗。」分手原因是甚麼？他說：「大家對愛情有唔同信仰同睇法，總之分歧好多，我唔想多講。」陳輝虹表示二人最近在平和氣氛下協議分手，他無奈地說：「總之係最近嘅事，幾時唔想再講，我曾經視佢係結婚對象，佢真係一個好女友，可惜呢段感情出現問題，我完全覺得好可惜。我哋喺埋過一齊，再分開，試問大家心情又點會好過？我愛一個人每次都會盡情投入。」
對於有報道指陳輝虹與憶蓮拍拖期間曾冷落憶蓮的女兒李喜兒，而喜兒也不喜歡陳輝虹，不知二人分手是否與此有關？他說：「完全唔關小朋友嘅事。」短短一年情火速玩完，究竟是誰提出分手？陳輝虹先答：「我哋一齊商量。」再問可是性格倔強的憶蓮提出時，他又說：「差唔多可以咁講，不過我哋係喺理智情況下講嘅。」這段情可有轉彎餘地？他語調哽咽的說：「我試過，要改變可能要再等20年，我真係覺得好可惜，可能佢想一個人自由啲。」
愛情重傷
陳輝虹嘗試救感情
問陳輝虹是否十分遷就憶蓮，他說：「兩個人一齊梗有互相遷就，分手後我一路都有同佢keep住聯絡，我哋仲係朋友關係，我雖然冇每日打電話畀佢，但都有傳短訊同通電話。」
從陳輝虹的言談之中，可知他仍深愛憶蓮，更直言會盡最大努力嘗試挽救這段感情，他說：「轉機嘅嘢我真係唔知，不過佢係金牛座嘅，佢𠵱家又出咗埠工作。」這次失戀令陳輝虹的情緒十分低落，但他表示暫時不會離開香港療情傷，仍會繼續工作。至於憶蓮現身在外地工作，明天才返港。
如常工作
中台兩地頻開個唱
此外，憶蓮今個月的工作排得密麻麻，15日和18日分別在北京和上海舉行演唱會後，25日會在香港和台灣同步推出國語碟，其後再於26日和27日在台北舉行演唱會，下月12日則在美國舉行個唱。她所屬的金牌經理人公司負責人黃柏高（Paco）昨日指二人的私事絕對不會影響工作，Paco說：「輝虹雖然係金牌嘅職員，但憶蓮嚟緊嘅工作全部係我一手策劃，輝虹係負責金牌嘅經理人公司部門，憶蓮嘅經理人係新加坡公司，負責佢唱片嘅係另一部門，佢哋喺工作上冇任何牽連，佢哋嘅私事唔會妨礙工作，一切如期進行。」
採訪：比華利
