有人話，夏天食辣菜，流過一身汗，會令人暑氣全消；講到食辣，又邊度有人及得上四川菜呢？由細食辣食到大嘅四川人張師傅，佢話食辣不單止消暑，仲可以排毒兼美容，睇吓個個四川姑娘皮光肉滑就知啦！今日佢一於教大家煮辣到飛起嘅四川菜式，包你食完，條脷仲係咁Fing吓Fing吓！
記者：葉雪芯
攝影：伍慶泉
鳴謝：滿江紅
（明日預告：消暑冰菜）
無一種辣椒係我食唔到嘅！
四川人喜歡食辣出晒名，由細餐餐食辣食到大嘅張師傅，佢簡直無辣不歡，來到香港做廚，都依舊每餐至少要有一款辣菜，佢仲話：「到現時為止，無一種辣椒係我食唔到嘅！」
即席硬食生辣椒
為了測試師傅能食辣嘅程度，即席叫佢生食一條辣椒，但佢都面不改容，厲害厲害！可能有不少人都覺得食辣一定好熱氣，但張師傅話我哋完全錯晒，食辣反而可以排毒㖭！食完辣，出完一身汗，散咗啲熱氣同濕氣，包你成個人都醒神晒，而且辣椒有豐富嘅維他命C，分分鐘愈食愈靚。佢仲爆料，話周不時有很多化妝品公司靚女，都鍾意食佢煮嘅辣椒菜，個個都食上癮，仲一粒暗瘡仔都無㗎！
四川水煮魚 湯清魚滑
價錢：$50
需時：20分鐘
材料：桂花魚骨6両、桂花魚片6両、野生椒1茶匙、酸菜1碗、上湯2碗、薑片10片、米酒/麻油少許
Fing脷指數：★★
1.汆水
先將一條桂花魚的魚肉及魚骨分開；並將魚骨切件，汆水待用。
2.熬湯
將酸菜下鑊炒熟，再放入魚骨、上湯、野生椒、薑片及酒，熬5分鐘。
3.煮魚
最後加入桂花魚片和麻油，魚肉轉色熟後，即可上碟。
貼士：煮桂花魚片時，用蛋白拌勻，魚肉會特別嫩滑。
青紅椒雞球 辣得有層次
價錢：$35
需時：20分鐘
材料：雞髀肉1隻、青紅尖椒2隻、蒜片10片、葱段少許、油2湯匙、鹽少許
Fing脷指數：★★★★
1.走油
將雞髀切件，下鑊走油。
2.炒辣椒
爆香蒜片和葱段，再加入青紅椒。
3.回鑊快炒
最後將雞回鑊，加鹽炒熟即可。
貼士：正宗做法要用烏雞，買唔到可改用白雞代替。
泡椒桂花蚌 辣到跳舞
價錢：$60
需時：20分鐘
材料：桂花蚌4両、泡椒1碗、窩笋半斤、雲耳4両、豆瓣醬少許、油2湯匙
Fing脷指數：★★★★★
1.蚌汆水
先將桂花蚌洗淨切好，汆水待用。
2.灼熟配料
將窩笋和雲耳灼熟待用。
3.回鑊炒勻
豆瓣醬和泡椒爆香，所有材料回鑊炒勻即可。
