二十幾年前，一隻堪稱超級難玩嘅《魔界村》，打到機迷痛不欲生，玩到媽聲四起；不過世人就係咁犯賤，愈難玩就愈要征服，久唔久就有續篇登場，一樣大受機迷歡迎。最新一集《極魔界村》搵PSP投胎再世，唔好意思佢依然係咁惡啃，加入變雞、變肥婆等更多惡搞花臣，更易GameOver。你話《孖寶兄弟》難玩？有機迷喺網上更評論佢難玩10倍！
文：陳福榮
三大模式各有各難
《極魔界村》的確令人又愛又恨，唔少機迷等到頸都長，但玩上手又媽聲四起！所以之前試版推出嗰陣已經有人話如果《新孖寶》嘅難度係1，咁《極魔》就一定係10！雖然聽起嚟好鬼恐怖，不過正因為咁先至有挑戰性，唔會玩兩嘢就玩晒冇貨賣。
秉承住CAPCOM平面動作遊戲優良傳統，《極魔》係以十幾年前嘅《超魔界村》作為藍本，再加幾個極之啜核嘅全新系統所組成，故此老手會發覺同以前一樣咁啱Feel，玩多兩玩先發現裏面天外有天，當佢係完全新作看待都冇問題。今集有3種唔同玩法畀你揀，分別係盔甲硬啲、死咗會喺嗰度出返嚟嘅初學者模式，比較正常嘅原創模式，同埋盔甲一擊即爆、死親都要由頭打過嘅街機模式。筆者玩咗好耐都仲未過到街機第一版，可想而知佢有幾難頂！
裝備多多考智慧
以前每集都有個魔法師，專登將你變成鴨仔或者青蛙咁樣阻頭阻勢，中咗招就要係咁避班敵人，想還拖都唔得，真係慘情。喺《極魔》都有類似嘅設定，但變嘅嘢就多元化好多，包括肥婆、骷髏骨、飛蛾、草蜢同埋甩毛雞，其中只有肥婆同骨仔可作有限度攻擊，另外亦會變大或者縮水影響行動。至於武器則多到有啲誇張，除咗長矛同刀仔外其他舊嘢全部冇得留低，變成新加入嘅穿心矛、散彈弩、火燄瓶、炸彈同最有用嘅荊棘鞭等。回力刀同鞭仲可以執埋寶物，加上PowerUp，變化可謂相當之多。魔法方面終於同武器分家，以前嘅魔法係跟住武器嚟出，今次就各顧各仲會計埋魔力消耗，全部10款要執晒嚟用都幾係嘢。
儲魔戒屈你爆兩次機
人哋三部曲就話打生打死爭隻魔戒啫，估唔到《極魔》都嚟玩呢套，但佢嘅要求就真係麻煩至極。雖然《魔界村》系列不嬲都要玩二周目至算爆機，今集佢就仲癲，打贏隻最後大佬至同你講，搵齊22隻戒指先好搵佢打多鑊，一下子吹你返去由頭嚟過！唔少人都話之前先執得嗰幾隻，其他點搵呀大哥？當然佢唔會無條件咁難為大家啦，只要留心版面內每個地方，應該發現有啲寶箱甚至戒指係放喺好無厘頭嘅地方，正常係點都去唔到。想要呢啲正嘢，當然係借助飛龍之盾等道具幫你飛過去執，但由於部份特殊物品要喺遊戲後段至到手，換言之屈你打二周目又好似幾合情合理嘅。
附送白掣襯晒白機
《魔界村》由最初響機舖出現，已經係21年前嘅事，唔計嗰啲唔啦更外傳佢只係推出過3集，分別係紅白機版出得仲屈機嘅初代、增設黃金盔甲出魔法嘅《大魔界村》同埋唔少人為佢而買超任嘅《超魔界村》，即使每集難度依舊令機迷叫苦連天，但亦因為咁佢嘅江湖地位先至有增無減。CAPCOMAsia向來都好關照熱心擁躉，之前送過PSP黑色十字掣等大家唔使捽到手指痛，𠵱家亦會隨《極魔》贈送PSP白色十字掣，佢較適合白機用戶使用，咁玩起嚟就自然更加得心應手啦。
PROFILE
遊戲類型：動作
對應機種：PSP
遊玩人數：1人
開發廠商：CAPCOM
行貨售價：$288
(C)CAPCOMCO.,LTD.2006ALLRIGHTSRESERVED.
