所有英國車書HotTalk一定係英國車展，今期AUTOCAR做晒封面，記者逐架試坐仲上埋鏡，一開波已經激讚話架CitroenC6夠晒舒服，尤其是後座，舒服到好似坐喺高級酒廊咁歎。除C6之外，同場仲有蓮花架未開發嘅Europa、三菱iCar，仲有架令記者見到都想嘔嘅CitroenC1，講到咁核突但又唔影相，呢度令我有啲失望！仲有兩大版場內花絮，有特技又有表演，最抵死係福特車廠個貴賓座，居然有埋眼睛按摩同剃鬚服務，老實講，車展車款唔多，有啲悶。
保時捷Cayman2.7同雷諾Clio比？戇居
今期記者竟然搵架保時捷Cayman2.7同雷諾架Clio197比，波子輸一個馬鼻，人家起步由0-62mph都只係要6.1秒，佢就要成6.2秒。記者大佬呀，一睇條標題知有問題，Cilo197係頂級版，咁你攞架入門版波子去比，一定慘遭劣評喇。記者試完後，話車價雖然平咗，但堂堂一架超級跑車，仲要係用番同Boxster副偈，呢個成績又真係令人失望，我就話個記者真係白癡。睇完劣作，揭去後面睇埋9架超級跑車喺飛機跑道一比高下，睇吓邊架最快，賓利、寶馬、保時捷、平治、福特、VXR，有幾快？你試車就開心，我感受唔到喎！
記者：黃婉冰
