「都唔知點樣講掂太子爺嘅，居然肯俾你同我哋做訪問，其實呢幾年我哋已經絕少接受訪問，問親都係邊個名人嚟過、名人鍾意食乜嘢咁，唉！我哋唔講㗎，我哋唔會洩露客人私隱。班老主顧對我哋咁好，我哋點會隨便講佢哋？外邊人唔明，就話我哋高竇。」在「陸羽茶室」當了30年樓面的阿成續說：「我喺度做，唔係貪『陸羽』啲客非富則貴、貼士多啲，而係因為有人情味。」難怪，八成熟客日日光顧，彼此自不然成為交心朋友，「記得有次有個名人請客，帶咗幾支法國92年Petrus上嚟，我哋隨口話：『呢支真係好嘢喎。』點知佢第二日搵人送咗兩支畀我哋歎，話好嘢齊齊飲，成萬幾蚊一支㗎大佬！好多時我哋病，幾個名醫就免費幫我哋診症，仲有呀，有次個夥計老竇病危，有客竟然送幾萬蚊畀佢過難關，你話呢亭好人好事，去邊度搵？」
「陸羽」的名畫古董大部份都不是買回來的，阿成說：「啲名家嚟飲茶，同老闆相熟，一時興起咪送兩件好嘢畀『陸羽』囉，名畫家黃永玉都試過即場畫幾幅細畫送畀我哋㗎。」有謂英雄慣見亦常人，他們反而懂得用平常心招呼，「呢30年來未見過夥計問客人攞簽名、影相，客人就係鍾意班夥計當佢係普通人。喺呢度返工無壓力，你試吓過時過節嚟吖，仲有氣氛呀，啲客互相問候又互相送禮，人情味濃到化唔開，我決定喺『陸羽』做過世㗎喇。」
記者：廖秀娟 攝影：陳盛臣
1.紫薑咕嚕肉$110
全部即叫即炸，外脆內軟肉汁豐富，顏色鮮艷賣相靚絕。紫薑自家醃製，辣中帶甜，與炸肉排味道非常配合。
2.鳳眼果燜雞$160
當造鳳眼果無油高纖，不時不食用來燜雞非常有益。入口，比栗子燜雞少了點油膩感，多一份清甜不覺飽滯。
3.柚皮燜鵝掌$150
鮮柚皮浸洗3日去苦澀味，燜鵝掌有肉味又有柚子清香。鵝掌燜得軟腍，入口即溶但又保持到鵝掌原形，火候控制到家。
陸羽茶室（25235463）
地址：中環士丹利街24-26號陸羽大廈