雨過天未青。「派比安」已經登陸，但啲刁民仍然繼續打電話上電台誣衊天文台只係掛三號波嘅科學決定係受到政治壓力。有個聽眾竟然話信李八方都唔信林超英台長！搞到台長要親自上港台《千禧年代》辯白。罪過罪過。
台長話，佢哋掛唔掛風球，係以人命安全為第一考慮，從來冇諗立法會開唔開到會；又話天文台今次遭遇，好似在戰場殺敵時俾人在背後放冷箭咁。聽完台長嘅心聲，八方又接到特首辦嘅電話，千叮萬囑要八方代澄清佢哋冇向天文台施加壓力。
八方了解成件事之後，覺得有林台長呢種特立獨行，既唔使畀面特首，又當班尊貴議員開會冇到嘅優秀公僕，真係特區之福。佢領導下嘅天文台，何止超英，簡直趕美。所以八方收回昨日言論，煲呔唔應該升佢官──應該將人才讓畀國家，等林台長好似陳馮富珍咁，他日揚名國際，為中國人爭光！