妹妹大叫：「開門呀！放我出嚟呀！」細妹嘅房門日日係咁壞，愈嚟愈難開，「換過把鎖喇！」妹妹又叫：「吓！搵師傅好噃！」唔使！其實大部份家用門鎖都可以自己更換，只要按部就班，見到螺絲就「鬆」螺絲，就可以拆走舊鎖，換上新鎖！細妺唔信，好彩有專業師傅偉成叔叔撐腰：「哥仔，你啱！不過細妺又錯唔晒，比如過千蚊嘅高級門鎖，就千奇咪亂拆。」咁騎呢？都係等師傅同我哋做吓示範！
記者：馮敏兒
攝影：伍慶泉、何家亮
模特兒：Jamie
師傅教落：偉成師傅
解鎖大法
唔見咗鎖匙？大門鎖壞咗？原來唔一定搵開鎖專家，只要用一把手電鑽，就可以破壞鎖頭。方法係鑽穿匙孔內有珠一邊嘅外圍圓圈線，就能令內裏嘅小珠失效，即刻開鎖。
房門篇
篤落手柄孔鎖即鬆
細妹以為房門鎖好神秘，「喺表面睇，連一個螺絲位都見唔到喎！」其實，只要稍稍有探索精神，喺手柄「拮一下」，就可以將佢徹底解體！
需時：10分鐘
難度：30分（100分滿分）
貼士
房門鎖由25蚊起，而上等貨嘅鋼珠特別靚，會愈開愈順。
大門篇
扭內外螺絲即換新
無帶鎖匙，結果要親手撬爛大門入屋！正所謂有破壞就有建設，爛咗？整翻囉！師傅話：「我出手，人工$200。」我猶豫！「不如咁，加多$200，買部靚靚鎖頭，教埋你裝，如何？」我心動！「屋苑9成都係老虎鎖，平均85至450蚊，以色列嘅出品最靚鋼料；再買多支十字批，即刻可以出手。」
需時：40分鐘
難度：70分
貼士
買鎖前先量度門尺寸厚度，讓店員以專用嘅蛇頭剪喺鎖膽嘅鎖心剪啱尺寸。
將鎖膽兩條螺絲桿轉到適中平衡水平，否則就會拗曲，不易轉動。
千斤鼎破門易小心！
連環爆格大盜猖獗，甚至無視幾千蚊一把嘅高級門鎖，真係好令人擔心！師傅話：「大盜除咗常用鐵筆外，最近流行用百零蚊嘅千斤鼎，只要屋門對面有一面牆可以借力，駁上水喉通，就可以無聲無息咁破開所有大門，無論多高貴嘅大閘，3分鐘唔使就撬開你！」那豈不大鑊？師傅話：「所以話，裝鐵閘就至安全。最理想嘅防盜閘其實係傳統舊屋邨嘅『欖閘』，佢堅在係鐵焊構成，所以唔怕鐵筆、唔怕千斤鼎。」他續說：「不過，大家都係一面倒為美觀而揀鋁閘，無法喇！」
