劉香萍女兒貝安琪昨日以美人魚造型出席商場活動，大派金魚，當中一位阿伯fans不時以手機拍她，其後獲贈金魚，表現十分受落。同樣被指為跟得星媽的劉香萍表示雖然與Rosemary母親Julie十分投契，但她十分贊成女兒拍拖，絕不會阻礙女兒的緣份。
貝安琪（Ankie）昨日現身大埔超級城，以性感美人魚造型，向商場顧客大派金魚，備受歡迎。其中一名上了年紀的男士以手機狂拍貝安琪，當接過她送贈的小金魚時，更顯得十分興奮。
決不棒打鴛鴦
問貝安琪知不知道甚麼是金魚佬？她說：「金魚佬我唔知係乜嘢，我淨係知鹹濕佬係乜啫。」問她有否遇過不快經歷，她說：「我就未試過，不過有個朋友喺德國啲隧道入面，遇過有個男人忽然喺佢面前除褲。」
長期做跟得媽咪的劉香萍都有在場，她主動跟記者回應近日有雜誌將她與名模Rosemary母親Julie作比較，她說：「身為Ankie媽咪，我唔會管得佢太嚴，佢有佢嘅自由。其實我都好鍾意Rosemary，佢好有條件成為星級影星，佢媽咪成日跟住佢係好正常，喺外國好多後生影星都係媽咪做經理人，我有時都會同Julie傾吓偈，同佢好投契。」
問劉香萍會否勸Julie對女兒的戀情持開放態度，不要棒打鴛鴦，她說：「拍拖好正常，我都希望Ankie快啲搵個男仔拍拖，呢啲係緣份，冇得阻，我都會接受個女拍拖，因為工作還工作，佢都有私人生活嘛。」
採訪、攝影：GeneNg
