侍仔：呢個世界係咪真係咁黑暗呢？
招積域：你又發咩嘢神經呀？近排成日講埋呢類歎息嘅說話，係咪同女友又鬧翻咗？
菠蘿文：係囉，俾人飛咗好易搵過個嘅。
侍仔：AC米蘭竟然可以踢歐冠盃，其他3隊打假波嘅，唔係降班就被扣分。
招積域：但呢個只係AC米蘭有分畀意大利足總扣，我覺得佢已經接受咗應得嘅刑罰。試問有幾多隊俾人扣咗30分，仲可以夠分數踢歐冠盃？
菠蘿文：但點解唔多唔少，啱啱扣夠30分呢條底線呢？諗落係意足總有心畀AC踢歐冠盃。
侍仔：菠蘿文講嘅就似人話啦！意足總永遠諗嘅只係所謂意大利足球形象，所以就容許打假波；𠵱家東窗事發，把口就重罰，但實際上就等於無罰。我𠵱家知道打假波嘅球隊只係罰扣分！而唔需要任何球員負責！
招積域：你都好黑心吓喎，要4隊一齊死。
意足總賞罰不分
侍仔：做錯事唔使罰，有冇搞錯呀！罰咗等於無罰，仲更加離譜！當初上訴之後可以減刑已經唔啱啦。
菠蘿文：今次件事反映喺意大利係可以打假波，俾人捉到嘅話，最多認句衰仔就可以過骨。罰得嗰幾10萬港紙，但有數以千萬計歐冠盃收益，即係黑箱作業。
招積域：以前都有句：「英甲波，蠱惑多」啦，你哋咪又係繼續賭英冠同英甲。𠵱家意大利有球會斷正，死唔晒全部，你哋班人又喺度話唔公平。講到尾，係咪因為自己輸咗唔少錢，先發脾氣扮正義先？
文︰高洛文