五六十年代的宮廷粵語片，東宮娘娘代表忠良賢淑，佼佼者是已故的余麗珍，而慣常被派演陰毒西宮的，除鳳凰女外，還有李香琴。琴姐是任姐任劍輝的忠實戲迷，也因為對方而決心加入戲行。結果上天真安排她們結戲緣，有場戲講述任姐和芳艷芬跪在琴姐面前聽其訓示，當年初出茅蘆的琴姐，因擔心演不好連累兩位大老倌長跪不起而緊張到暈。 撰文：駱華齡
李香琴（琴姐）從小醉心演戲，小時候在澳門讀書，一放學就跑到戲棚欣賞任劍輝（任姐）做大戲，還像其他戲迷一樣，跑到任姐家中守候，又試過寫信給偶像。雖然未獲任姐回覆，不過琴姐已因此立定決心加入戲行。
被迫減薪
16歲那年琴姐終於踏足梨園，惜後來粵劇式微，惟轉往影圈發展，卻因此有機會跟任姐拍戲，她說：「當年我同任姐合作拍《漢武帝夢會衞夫人》，當時我唔係做西宮，而係做正宮，劇情講任姐要收芳艷芬入宮，佢哋兩個要跪喺我面前聽我訓示，當時我真係緊張到暈，如果我NG嘅話就要佢哋跪耐啲。好彩一take過完成，連後面啲宮女都即刻拍手掌。」
當年琴姐為了生計，從不推戲，可惜辛苦背後卻得不到回報。琴姐說：「初頭我係300蚊拍一部電影，之後就有500蚊，但係有電影公司拍少我一啲戲份，然後自動減咗我200蚊人工。嗰時我哋唔會去追數，因為怕佢哋唔再搵我拍戲，只好忍咗去，被欠嘅數足足有成十幾萬，當時都可以買到層樓喇！」
免費搭車
琴姐常被派演奸妃、情婦及惡後母等角色，尤以飾演西宮最出位。雖然多年來仍未能攀上一線位置，但琴姐也不覺遺憾：「當年成日做西宮或者惡死阿媽都係為咗搵食，如果做主角就唔可以套套戲都拍。雖然人哋行星光大道冇我份，獎又冇我份，但我唔mind，因為呢啲係要爭取，如果我恨要，一早已經攞到啦！呢行係後浪推前浪，到你年紀要做人媽咪就要做，唔可以話永遠都係二十幾歲。我從來冇後悔入行，因為做呢行真係好方便，仲成日搭免費的士㖭！」
在幕前慣演惡母親，現實中琴姐是慈祥好媽媽，還收了不少契仔契女，她說：「每逢我生日或者母親節，佢哋唔得閒同我慶祝都會打個電話畀我，大家就好似係大家庭一樣，真係好開心。」
