新地郭氏三兄弟之中，三少炳聯最唔鍾意同傳媒打交道，每次出席完公開活動之後即閃，唔理你企喺幾十碼以外，抑或兜口兜面問佢都好，總之唔想答你就借咗聾耳陳隻耳，聽你唔到睇你唔到，加埋幾個大隻保安護駕，要埋身真係好難。所以每次三少出席公開活動，傳媒只可以利用提問嘅時間，博吓大霧問兩句。
好似噚日咁，新地同郭氏家族共捐3000萬畀中大，搞個「新地心理健康工程」計劃，三少身為中大校董會副主席，又係新地代表，梗係要到場主禮，之不過一問到收購邵氏嘅傳聞，三少都未開咪拒絕回應，新地兩個大公關已經落晒閘，護主擋駕，搞到三少笑笑口話：「我哋嘅公關好強！」
收購交易唔肯講，但郭炳聯就承認做大企業老闆，壓力梗係有，最緊要識得放鬆，珍惜擁有嘅嘢；每次佢覺得有壓力，就會做吓戶外活動，同屋企人傾偈，或者睇歷史書，每年可以去三幾次旅行更加好啦！